अभिमुखीकरण तालिम प्रदायक संस्थालाई नवीकरण गर्न विभागले गर्‍याे सूचना  - News Birat

अभिमुखीकरण तालिम प्रदायक संस्थालाई नवीकरण गर्न विभागले गर्‍याे सूचना 

न्यूज विराट

काठमाडाैं, ३२ जेठ-वैदेशिक रोजगार विभागले नगद ५ लाख धरौटी राखेर नवीकरण प्रक्रिया सुरु गर्न अभिमुखीकरण तालिम प्रदायक संस्थाहरूलाई अनुरोध गरेको छ ।  सरकारले वैदेशिक रोजगार नियमावली संशाेधन गर्दै तालिम प्रदायक संस्थाको हकमा ५ लाख नगद धरौटी राख्नुपर्ने व्यवस्था गरेको थियो ।

तालिम प्रदायक संस्थाले अब नवीकरण गर्दा अनिवार्य रूपमा नगद धरौटी बुझाएको भरपाई पेस गर्नुपर्ने विभागले जनाएको छ । कोरोना महामारीका कारण हाल वैदेशिक रोजगार ठप्प छ, जसका कारण अहिले तत्काल नगद धरौटी राख्न सम्भव नभएकाले धरौटी राख्ने समय थप गरिदिन तालिम प्रदायक व्यवसायीहरूले माग गर्दै आएका छन् ।

विभागले सूचना जारी गरी वैदेशिक रोजगारसँग सम्बन्धित काम गर्ने सबै संस्थाहरूलाई नवीकरण प्रक्रिया सुरु भएको जनाउँदै तालिम प्रदायक संस्थाहरूलाई अनिवार्य ५ लाख नगद धरौटी राख्न अनुरोध गरेको हो ।

विभागले इजाजतपत्र प्राप्त संस्था, म्यानपावरहरू, अभिमुखीकरण तालिम प्रादायक संस्थाहरू, सीपमूलक तालिम प्रदायक संस्थाहरू, घरेलु कामदारलाई तालिम दिने संस्थाहरू र केयर गिभरसम्बन्धी तालिम दिने र पठाउने संस्थाहरूलाई नवीकरणका लागि सूचना जारी गरेको हो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles