विराटनगर, जेठ २५–प्रदेश १ मा आइतबार एकैदिन १० जनामा कोरोना भाइरस (कोभिड–१९) संक्रमणको पुष्टि भएको छ । आइतबार विराटनगर महानगरपालिका–३ की २२ बर्षीया युवतीमा कोरोना संक्रमण पुष्टि भएको छ ।

त्यस्तै सुनसरीको इनरुवा नगरपालिका–८ का २३ र वडा नं. २ का २६ बर्षीय पुरुषमा कोरोना संक्रमण पुष्टि भएको हो । त्यसैगरी मोरङकै रतुवामाई नगरपालिका–२ का १८ र १४ बर्षका दुई किशोरमा कोरोना संक्रमण पुष्टि भएको छ । उदयपुरमा पुनः तीन जनामा कोरोना संक्रमण पुष्टि भएको छ ।

तीन दिन अघि स्वाब संकलन गरी काठमाडौंको टेकुस्थित जनस्वास्थ्य प्रयोगशालामा गरिएको परिक्षणमा तीन जनामा कोरोना संक्रमण पुष्टि भएको हो । कोरोना पुष्टि भएका मध्ये बेलका नगरपालिका ३६ बर्षीय पुरुष र २७ बर्षीया महिला रहेका छन् भने चौदण्डीगढी नगरपालिकाका ३६ बर्षीय पुरुष रहेका छन् । संक्रमित तीनैजनालाई विराटनगरको कोशी अस्पताल कोभीड १९ उपचार केन्द्रमा ल्याइदैछ ।

यस्तै झापाको अर्जुनधारा नगरपालिका–२ का २३ र २७ बर्षीय पुरुषमा पनि कोरोना संक्रमण पुष्टि भएको छ । आज पुष्टि भएकासँगै प्रदेश १ मा २ सयय ५७ जनामा कोरोना संक्रमण पुष्टि भएको प्रदेश १ सामाजिक विकास मन्त्रालयले जनाएको छ ।

हाल सम्म प्रदेश १ को झापा जिल्लामा १ सय ३८, मोरङमा १९, सुनसरीमा ४१, धनकुटामा ८, तेह्रथुममा २, संखुवासभामा २, भोजपुरमा ६, खोटाङमा ४ , सोलुखुम्बुमा १र उदयपुरमा ३६ जनामा कोरोना संक्रमण पुष्टि भैसकेको मुख्यमन्त्री तथा मन्त्री परिषदको कार्यालयले जनाएको छ । हाल सम्म प्रदेश १ बाट ९० जना कोरोनालाई जितेर घर फर्किएका छन् ।