सरकारलाई काभ्रेलीका तर्फबाट ‘डल्लै’ धन्यवाद : गोकुल बाँस्कोटा - News Birat

सरकारलाई काभ्रेलीका तर्फबाट ‘डल्लै’ धन्यवाद : गोकुल बाँस्कोटा

न्यूज विराट

काभ्रेपलाञ्चोक, जेठ २५-प्रतिनिधिसभा सदस्य एवं निवर्तमान सञ्चार तथा सूचना प्रविधिमन्त्री गोकुलप्रसाद बाँस्कोटाले सरकारलाई सम्पूर्ण काभ्रेपलाञ्चोकका जनताले ‘विशेष धन्यवाद’ दिएको बताएका छन् । उनले भर्खरै सरकारले ल्याएको आर्थिक वर्ष २०७७/७८ को विनियोजित बजेटले काभ्रेली जनता उत्साहित भएकोसमेत उल्लेख गरेका छन् ।

विश्वनै कोरोनाभाइरसका कारण आक्रान्त भएको वर्तमान अवस्थामा आर्थिक संकट र चुनौती झेल्दै सरकारले सिंगो काभ्रेपलाञ्चोकलाई समृद्ध बनाउनेतर्फ बजेट विनियोजन गरेकामा पूर्वमन्त्री बाँस्कोटाले नेपाल कम्युनिष्ट पार्टी (नेकपा)का अध्यक्ष एवं प्रधानमन्त्री केपी शर्मा ओली नेतृत्वको सरकारलाई जिल्लावासीका तर्फबाट धन्यवाद दिएका हुन् । ‘प्रस्तुत बजेटले जिल्लाको समग्र विकास प्रक्रियालाई अत्यन्त सही दिशासाथ अघि बढाएको छ, यसैले प्रम ओली र उहाँको सरकारलाई काभ्रेलीको तर्फबाट डल्लै धन्यवाद दिएको हुँ,’ उनले भने ।

बाँस्कोटाले सडक, पुल, खानेपानी, कृषि, सिँचाइ, सहरी पूर्वाधार, सहायक राजमार्गको निर्णय सहितको बजेट व्यवस्थापन, पर्यटन पूर्वाधार, ठूला र मझौला विद्युत आयोजनाको सम्भाव्यता अध्ययन, करिडोर निर्माण, सुरक्षण छापाखाना निर्माण, मदन भण्डारी र प्रतिरक्षा राष्ट्रिय विश्वविद्यालय स्थापना, दुई राजमार्गको स्तरोन्नति, हवाई मैदानजस्ता दर्जनौँ योजनामा करोडौँ बजेट विनियोजन भएकामा सरकारलाई ‘विशेष धन्यवाद’ दिएको बताए । उनले भने, ‘हामीले धेरै काम गर्नुछ, समय पनि छ, अझ प्रदेशको बजेट आउनै बाँकी छ, म ढुक्क छु, केन्द्रमा समेट्न नसकिएका योजना वाग्मती प्रदेशले समेट्नेछ ।’

अर्थमन्त्री डा. युवराज खतिवडाद्वारा यही जेठ १५ गते प्रतिनिधिसभामा प्रस्तुत आव २०७७/७८ को विनियोजित बजेटमा काभ्रेपलाञ्चोकको विकास योजनाका लागि (स्थानीय तहबाहेक) विभिन्न शिर्षकमा अर्ब हाराहारीमा बजेट विनियोजन भएको छ । चालु दीर्घकालीन महत्वका योजना जारी नै रहेको र आगामी वर्षको बजेटले काभ्रेपलाञ्चोकको विकासमा अर्को फड्को मार्ने भएकाले यसपटक सरकारलाई विशेष धन्यवाद दिइएको बाँस्कोटाले बताए । ‘समृद्ध काभ्रेपलाञ्चोक निर्माणको हाम्रो यात्रा अकण्टक इन्द्रावती र सुनकोशी नदीझैँ शान्त तर गतिसाथ अघि बढिरहनेछन्,’ उनले भने । सामाजिक सञ्जालमार्फत पनि ‘प्रम ओली र उहाँको नेतृत्व सरकारलाई डल्लै धन्यवाद काभ्रेलीको तर्फबाट’ भनेका छन् ।

आगामी वर्षका लागि प्रस्तुत बजेटमा काभ्रेपलाञ्चोकका १३ स्थानीय तहलाई करिब साढे चार अर्ब छुट्याइएको छ । सोमध्ये बनेपा नगरपालिकालाई ५२ करोड १० लाख, पनौती नगरपालिकामा ४४ करोड ५२ लाख, धुलिखेल नगरपालिकामा ४० करोड ४६ लाख, नमोबुद्ध नगरपालिकामा ३८ करोड आठ लाख, मण्डनदेउपुर नगरपालिकामा ३५ करोड ३८ लाख तथा रोशी गाउँपालिकालाई ३८ करोड ४९ लाख, चौँरीदेउरालीमा ३२ करोड ३८ लाख, भुम्लुमा २८ करोड ३७ लाख, तेमालमा २७ करोड ८८ लाख, महाभारतमा २६ करोड ८२ लाख, बेथानचोकमा २४ करोड २२ लाख र खानीखोला गाउँपालिकामा २० करोड १८ लाख रूपैयाँ रकम वियोजन गरिएको हो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles