काठमाडौं, २१ जेठ-बुधबार थप २ सय १ जनामा कोरोना भाइरस (कोभिड-१९) संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा. विकास देवकोटाले नेपालमा थप २ सय १ जनामा कोरोना संक्रमण देखिएको पुष्टि गरेका हुन् ।

देशभरका विभिन्न प्रयोगशालामा गरिएको परीक्षणमा थप २ सय १ जनामा कोरोना संक्रमण देखिएको हो । योसँगै नेपालमा कोरोना संक्रमित हुनेको संख्या २ हजार ३ सय पुगेको छ । उनका अनुसार २ सय १ सय ३९ जना पुरुष र १ सय ७० जना महिलामा संक्रमण देखिएको छ ।

प्रवक्ता डा. देवकोटाले आज थप १२ जना कोरोना भाइरस संक्रमणलाई जितेर घर फर्किएको बताए । बुटवलस्थित कोरोना विशेष अस्पतालबाट १ स्वास्थ्यकर्मीसहित ४ जनाले कोरोनालाई जितेका छन् । जनकपुर अस्पतालबाट धनुषा, महोत्तरी र सर्लाही ५ जना डिस्चार्ज भएका छन् ।

टेकु अस्पतालबाट १ जना डिस्चार्ज भएका छन् । बलम्बुबाट रौतहटका १ जना डिस्चार्ज भएका छन् । त्यसैगरी, टिचिङ अस्पतबाट कपिलवस्तुकी बालिका डिस्चार्ज भएकी हुन् ।  डिस्चार्ज हुनेको संख्या २ सय ७८ पुगेको छ । डिस्चार्ज हुनेमा २ सय २२ जना पुरुष ५६ जना महिला रहेका छन् ।

स्वास्थ्य मन्त्रालयको पछिल्लो विवरणअनुसार पीसीआर विधिबाट ८० हजार २ सय ६७ नुमना परीक्षण गरिएको छ । आरडीटी विधिबाट १ लाख २० हजार ३ सय ७९ जनाको परीक्षण गरिएको छ ।

त्यसैगरी, २४ घण्टाको अवधिमा पीसीआर विधिबाट ४ हजार ९ सय २४ नमुना परीक्षण गर्दा आरडीटी विधिबाट  ४ हजार २४  जनाको परीक्षण गरिएको छ । देशका विभिन्न स्थानमा १ लाख ५५ हजार ८ सय ६८ जना क्वारेन्टाइन रहेका छन् ।