थप २ सय ८८ जनामा कोरोना संक्रमण - News Birat

थप २ सय ८८ जनामा कोरोना संक्रमण

न्यूज विराट

काठमाडौं, २० जेठ-नेपालमा थप २ सय ८८ जनामा कोरोना भाइरस संक्रमण देखिएको छ । जसमध्ये २ सय ७० जना पुरुष छन् भने १८ जना महिला छन् । स्वास्थ्य मन्त्रालयको नियमित पत्रकार सम्मेलनमा प्रवक्ता विकास देवकोटाले देशका विभिन्न स्थानमा गरिएको पछिल्लो विवरणअनुसार २ सय ८८ जनामा कोरोना संक्रमण देखिएको जानकारी दिएका हुन् । योसँगै नेपालमा कोरोना भाइरस संक्रमितको संख्या २ हजार ९९ पुगेको छ । कुल संक्रमितमध्ये १ हजार ९ सय ४९ जना पुरुष र १ सय ५० जना महिला छन् ।

पछिल्लो विवरणअनुसार देशभरबाट ४५ जना डिस्चार्ज भएका छन् । शिक्षण अस्पतालबाट १, गुल्मी अस्पतालबाट १ जना, भीम अस्पतालबाट २५ जना, धरानको बीपी कोइराला स्वास्थ्य विज्ञान प्रतिष्ठानबाट १८ जना निको भएका छन् । कुल २ सय ६६ जनाले कोरोनालाई जितेर डिस्चार्ज भएका छन् । जसमध्ये २ सय १२ जना पुरुष र ५४ जना महिला छन् ।

७५ हजार ३ सय ४३ नमुना पीसीआर विधिबाट परीक्षण गरिएको छ । आरडीटी विधिबाट १ लाख १६ हजार ३ सय ४५ जनाको परीक्षण गरिएको छ । २४ घण्टाको अवधिमा ३ हजार ४ सय ४० नमुना पीसीआर विधिबाट गरिएको छ भने २ हजार ५ सय ८८ जनाको आरडीटी विधिबाट परीक्षण गरिएको छ ।

देशभर १ लाख ४५ हजार ३ सय ७५ जना क्वारेन्टाइनमा रहेका छन् । देशभरका अस्पतालका आइसोलेसनमा १ हजार ८ २५ उपचाररत रहेको स्वास्थ्य मन्त्रालयले जनाएको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles