कोरोनाबाट बालिकाको मृत्यु भएपछि बाजुरामा उच्च सतर्कता - News Birat

कोरोनाबाट बालिकाको मृत्यु भएपछि बाजुरामा उच्च सतर्कता

न्यूज विराट

बाजुरा, १९ जेठ-कोरोना भाइरस (कोभिड-१९) बाट संक्रमित १ बालिकाको मृत्यु भएपछि बाजुरा जिल्लामा उच्च सतर्कता अपनाइएको छ । जिल्ला प्रवेश गर्ने सबै नाकामा जाँचलाई कडाइ गरी सतर्कता अपनाइएको निमित्त प्रमुख जिल्ला अधिकारी समिर भण्डारीले जानकारी दिए ।

उनले भने, ‘सरकारले जारी गरेको बन्दाबन्दीलाई जिल्लाका सबै नागरिकले पालना  गरिदिन आग्रह गर्दछु ।’ जोखिम हुन नदिन  छिमेकी जिल्ला अछाम, बझाङ, कालीकोट, मुगु र हुम्लाका नाकाहरूबाट आवत जावतसमेत पूर्णरुपमा बन्द गर्न लागिएको उनले जानकारी दिए ।

भारतबाट फर्किइ आइसोलेसनमा राखिएकी बूढीगंगा नगरपालिका-१ का २ वर्षीया बालिकाको कोरोना भाइरसको सङ्क्रमणबाट आइतबार मृत्यु भएको थियो । मृतकसहित उनका आमा र बुबा १३ जेठ गते कैलालीको गौरीफण्टा सीमानाका हुँदै भित्रिएका थिए । बालिकाका बुबालाई भने कोरोना नेगेटिभ देखिएको छ । कोरोनाको संक्रमणबाट सुदूरपश्चिम प्रदेशमा पहिलो मृत्यु भएपछि स्थानीयवासीमा सन्त्रास देखिएको छ ।

बूढीगङ्गा नगरपालिकाका नगरप्रमुख दीपकविक्रम शाहले बाहिरबाट नगरमा भित्रिनेको आवागमनमा तथा बजारमा जथाभावी हिँडडुल गर्नमा समेत रोक लगाउन लागिएको जानकारी दिए । आइतबार जिल्ला प्रशासन कार्यालयमा बसेको बैठकमा रोगको रोकथामका लागि थप सतर्कता अपनाउने बारेमा छलफल गरिएको थियो । रासस  

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles