काठमाडौं, १८ जेठ-कांग्रेस सांसद तथा उद्योगी विनोद चौधरीले सरकारले आगामी आर्थिक वर्षका लागि अनुमान गरेको राजस्व सामान्य अवस्थामा पनि उठ्न नसक्ने दाबी गरेका छन् ।

आइतबार बजेटमाथिको छलफलमा चौधरीले चालू वर्षमा १० महिना पूर्ण रूपमा अर्थतन्त्र चलयमान हुँदा पनि ८ खर्बबराबरको राजस्व पनि उठ्न नसक्ने स्थितिका बीच आगामी वर्षको राजस्व लक्ष्य महत्त्वाकांक्षी भएको बताएका हुन् ।

आगामी दिन थप कठिन बन्ने अवस्थामा रोजगारी गुमेकाको जीविकोपार्जनलाई नै सरकारले पहिलो आवश्यकता र प्राथमिकतामा राख्नुपर्ने बताए । उनले आफूहरूलाई सरकार विरोधी भने पनि सत्रू नठान्नका लागि आग्रह गरेका छन् । सरकारका हरेक नीति तथा कार्यक्रममा कांग्रेस भएको भए के गर्थ्यो भनेर सुझाव दिएको उनले बताए ।

कोरोनाबाट प्रभावित अर्थतन्त्रको पुनरुत्थानका लागि २ खर्ब ५० अर्बको अनुदान दिन सरकारसमक्ष प्रस्ताव राखे पनि अर्थमन्त्रीले बेवास्ता गरेको उनको संकेत छ । उनले बजार बन्द, यातायात बन्द, उद्योग कलकारखान बन्द भएको अवस्थामा ब्याजको मिटर र विद्युतको मिटर चलिरहेकाले निजीक्षेत्र समस्यामा परेको बताए ।