विराटनगर, १७ जेठ-प्रदेश १ का सामाजिक विकास मन्त्री जीवन घिमिरेको निर्देशनपछि सुनसरी धरानको बीपी कोइराला स्वास्थ्य विज्ञान प्रतिष्ठानले कोरोना संक्रमितलाई भर्ना गरेको छ ।

झापाको कचनकवलका २७ जना कोरोना संक्रमितलाई अस्पतालले भर्ना नलिएपछि मन्त्री घिमिरे आज बिहान अस्पताल पुगेका थिए । अस्पताल पुगेर उनले संक्रमितलाई तत्काल भर्ना गर्न निर्देशन दिएका थिए । कचनकवलबाट राति धरान आइपुगेका २७ जना संक्रमित रातभर अस्पताल बाहिरै बसेका थिए ।

संक्रमितलाई भर्ना गरिएपछि प्रतिष्ठानका उपकुलपति डा.ज्ञानेन्द्र गिरी, अस्पताल निर्देशकलगायतसँग मन्त्री घिमिरेले भर्ना नगर्नुको कारण र कमजोरीको पहिचान गर्न निर्देशन दिएका छन् ।

आगामी दिनमा कमजोरी नदोहोरिने वातावरण मिलाउन उनले निर्देशन दिए । उनले भने ,‘ घटना पुन दोहोरिए कारवाही गरिने छ ।’ उपकुलपति डा. गिरीले बीपीको कोभिड उपचार केन्द्रमा १ सय ५० वेड तयारी अवस्थामा रहेको बताएकै कारण कचनकवलबाट २७ संक्रमित पठाइएको मन्त्री घिमिरेले जानकारी दिए ।

प्रदेश १ मा १ सय ५८ संक्रमितमध्ये ३० जना डिस्चार्ज भएका छन् । कोसी अस्पताल कोभिड-१९ उपचार केन्द्रमा ३४ जना र धरानमा ९४ जना उपचाररत रहेका छन् ।