फर्किन चाहने नेपालीलाई विवरण दिन अस्ट्रेलियास्थित नेपाली दूतावासको आग्रह - News Birat

फर्किन चाहने नेपालीलाई विवरण दिन अस्ट्रेलियास्थित नेपाली दूतावासको आग्रह

न्यूज विराट

काठमाडौं, १६ जेठ-अस्ट्रेलियास्थित नेपाली दूतावासले नेपाल फर्किन चाहनेलाई आफ्नो विवरण अध्यावधिक गर्न सूचना जारी गरेको छ । कोरोना भाइरस (कोभिड–१९) को महामारीका कारण नेपाल फर्किन नपाएका र तत्काल नेपाल फर्किनुपर्ने बाध्यतामा रहेका अस्ट्रेलिया र अस्ट्रेलियास्थित दूतावासको कार्यक्षेत्रमा रहेका देशमा रहेका नेपालीलाई प्राथमिकताका आधारमा नेपाल फर्काउने तयारी गरिएको बताएको छ।

नेपाल सरकार मन्त्रिपरिषदको १२ जेठको निर्णयअनुसार नेपालीलाई फर्काउने व्यवस्था गर्न लागिएको दूतावासले जनाएको छ । नेपालीहरुलाई स्वदेश फर्काउनका लागि यसअघि दूतावासको फेसबुक पेज, इमेल, इमजेन्सी रजिष्ट्रेसन फाराम तथा टेलिफोनमार्फत् नाम टिपाएका र टिपाउन बाँकी रहेका नेपाल फर्कन चाहने सम्पूर्ण नेपालीले राजदूतावासको वेभसाइटमा राखिएको फारम भरेर २ जुन २०२० सम्ममा दूतावासमा बुझाउन आग्रह गरेको छ ।

विवरण अध्यावधिक भएपश्चात् मात्र नेपाल फिर्ता जान चाहने सम्बन्धमा प्राथमिकता निर्धारण गर्न, नेपालसम्मको पहुँच सुनिश्चित गर्न र नेपाल पुगेपश्चातको क्वारेन्टाइनको व्यवस्थापन गर्न सहज र सहयोग पुग्ने भएकोले सही विवरण उपलब्ध गराइदिनु अनुरोध गरेको छ ।

नेपाल फर्किन चाहनेहरुले नेपाल सरकारले निर्धारण गरेका शर्तहरु पालना गर्नुपर्नेहुन्छ । नेपाल आउनेहरुले अनिवार्य रूपमा १४ दिनसम्म क्वारेन्टाइनमा र थप ७ दिन होम क्वारेन्टाइनमा बस्नुपर्नेछ भने हवाई उडान खर्च, होटल क्वारेन्टाइन खर्च, विमानस्थलदेखि क्वारेन्टाइनस्थलसम्मको यातायात खर्चलगायतका सम्पूर्ण खर्च व्यक्ति स्वयंले ब्यहोर्नु पर्नेछ ।

यस्तै विमानमा यात्रा गर्नुअघि कोभिड–१९ संक्रमण नभएको पीसीआर रिपोर्ट पेश गर्नुपर्नेछ भने आफ्नो साथमा पनि राख्नु पर्नेछ । विदेशबाट जाने प्रत्येक यात्रुले त्रिभुवन अन्तर्राष्ट्रिय विमानस्थलको आगमन कक्षमा स्वास्थ्य स्वघोषणा फाराम भर्नु पर्नेछ भने ज्वरो मापन गरी १००.४ डिग्री ज्वरो आएको पाइएमा सोझै आइसोलेसन र अन्यलाई होल्डिङ सेन्टरमा लगिने छ ।

सबैले मोबाइलमा स्वास्थ्य तथा जनसंख्या मन्त्रालयको ‘हाम्रो स्वास्थ्य एप’ डाउनलोड गरी क्वारेन्टाइनमा रहँदाको अवधिमा नियमित रूपमा स्वास्थ्य विवरण अध्यावधिक गर्नु पर्नेछ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles