विराटनगर, जेठ १५-जातकै कारण रुकुम पश्चिममा दलित युवक नवराज विक सहित चारजनाको हत्या भएको भन्दै मोरङको उर्लाबारीमा विरोध प्रदर्शन गरिएको छ ।

दलित संघर्ष समिति, विश्वकर्मा सेवा समिति उर्लाबारी, राष्ट्रिय दलित पत्रकार संघ मोरङलगायत संघ संस्थाका दलित अगुवाहरुले विरोध प्रदर्शन गरेका हुन् । स्थानीय दलित अगुवा तथा राजनीतिक दलका नेता–कार्यकर्ताकहरूको सहभागितामा उर्लाबारी नगरपालिकाको मंगलबारेमा बिहीबार भेला भएर प्लेकार्डसहित प्रदर्शन गरिएको हो ।

सामाजिक दुरी कायम गर्दै सयौँको संख्यामा उपस्थित उनीहरुले ‘जातीय आधारमा हत्या कहिलेसम्म? हामी कहिलेसम्म मौन बस्ने ? जवाफदेही को ? मान्छे मान्छेमा के फरक छ र ? संविधानले दिएको अधिकार कहिलेसम्म उल्लंघन गर्ने ?’ लगायतका नारा लेखेको प्लेकार्ड बोकेर प्रदर्शन गरेका थिए ।

प्रदर्शनपछि आयोजित कोणसभामा बोल्दै उर्लाबारी नगरपालिका–३ वडा सदस्य सम्झना नेपालीले जातीय विभेदको आधार चौरजहारीमा जघन्य अपराध भन्दै निष्पक्ष छानबिन गरी दोषीलाई कडा कारवाहीको माग गरिन् ।

घटनालाई सत्ता र शक्तिको आडमा ढाकछोप र अपव्याख्या नगर्न आग्रह गर्दै उनले त्यसो गरिए दलितसमुदाय कडा संघर्षमा उत्रने चेतावनी समेत दिइन् । कोणसभामा बोल्दै विश्वकर्मा समाज सेवा समिति उर्लाबारीका अध्यक्ष खड्गबहादुर सुनारले उक्त घटना मानवताविरुद्धको क्रुर अपराध भन्दै सो घटनाले नेपाललाई विश्वमै कलंकित र लज्जित बनाएको बताए ।

दोषीलाई कारवाही र पीडितले न्याय नपाएसम्म सो घटना नसेलाउने भन्दै सरकारले यसलाई गम्भीर रुपमा लिनुपर्ने उनले बताए । रुकुमको चौरजहारीकी सुष्मा ठकुरी र जाजरकोटका नवराज बिश्वकर्माले अन्र्तजातिय बिवाह गर्न लागेको भन्दै गएको जेठ १० गते केटी पक्षले प्रेमी नवराज र उनका साथीहरुलाई कुटपिट गरेर हत्या गरेका थिए । नवराजसहित ४ जनाको शव भेरी नदीमा मृत अवस्थामा फेला परिसकेको छ । अझै २ जना बेपत्ता रहेकाले खोजि कार्य जारी रहेको जनाइएको छ ।

प्रधानमन्त्रीलाई ज्ञापनपत्र
घटनाको विरोधमा दलित अधिकारकर्मीहरुले इलका प्रशासन कार्यलयमार्फत प्रधानमन्त्रीलाई ज्ञापनपत्र पनि बुझाएका छन् । दोषीलाई कारवाही, मृत्यु भएका युवाहरूलाई सांस्कृतिक शहीद घोषणा र घटनाको निष्पक्ष छानविनका लागि संसदिय समिति गठनको माग गर्दै ज्ञापनपत्र बुझाइएको राष्ट्रिय दलित पत्रकार संघ मोरङका सचिव तिलक बर्देवाले बताए ।