भारतसँगको सीमा पूर्ण रुपमा नियन्त्रणमा छ : चीन - News Birat

भारतसँगको सीमा पूर्ण रुपमा नियन्त्रणमा छ : चीन

न्यूज विराट

एजेन्सी, जेठ १४-चीनले भारतसँगको सीमाक्षेत्रको अवस्था पूर्ण रूपमा नियन्त्रणमा रहेको जनाएको छ । चीनले दुई देशबीच रहेको सीमा विवाद वार्ताको माध्यमबाट हल गर्न सकिने समेत चीनले स्पष्ट पारेको छ ।

भारत र चीनको सीमाक्षेत्रमा सुरक्षा फौजको तैनाथी बढिरहेकाे बेला चिनियाँ विदेश मन्त्रालयका प्रवक्ताको यो भनाइ बाहिर आएको हो । विदेश मन्त्रालयका प्रवक्ता झाओ लिजियानले पत्रकार सम्मेलनका क्रममा सीमासँग सम्बन्धित समस्या समाधानका लागि चीन पहिल्यैदेखि स्पष्ट रहेको समेत बताए ।

उनले चीनका राष्ट्रपति सी जिनपिङ र भारतीय प्रधानमन्त्री नरेन्द्र मोदीबीच गत वर्ष भएको शिखर बैठकमा बनेको सहमतिको चीनले कडाइपूर्वक पालना गरिरहेको बताए ।

भारतका लागि चीनका राजदूत सुन विडोंगले भारत र चीन मिलेर कोरोना भाइरसविरुद्धको लडाइँका लागि प्रतिवद्ध रहेको बताएका छन् । उनले दुई देशबीच राम्रो सम्बन्ध राख्नका लागि दुवै देशको उत्तिकै जिम्मेवारी भएको समेत बताएका छन् ।

उनल दुई देशबीचको सम्बन्धलाई असर पार्ने विषयसँग टाढा रहनुपर्ने बताएका छन् । उनले आपसी वार्ताबाटै समस्या समाधान गर्नुपर्नेमा जोड दिएका छन् ।

लद्दाखको गलवान घाँटीमा दुवै देशले पछिल्ला दिनमा सैनिकको तैनाथी बढाएका छन् । दुई देशका सेनाबीच यसै महिनामात्रै नाथु–ला र पेंगोग त्सो क्षेत्रमा झडप भइसकेकोे छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles