सुर्खेत, १३ जेठ-कर्णालीमा मुख्यमन्त्री महेन्द्रबहादुर शाहीले कर्णाली प्रदेशसभाको छैठौँ अधिवेशनलाई सम्बोधन गर्दे रुकुम जिल्लामा घटेको घटना दुःखद भएको बताएका छन् । एक्काइसौँ शताब्दीमा पनि जातका नाममा भएको यो घटनाले प्रदेश सरकारलाई स्तब्ध भएको बताए ।

घटनाको सत्य तथ्य छानबिन गर्न गृह मन्त्रालयले समिति गठन गरि काम अगाडि बढाइसकेको र प्रदेश सरकारको तर्फबाट छानबिन, दोषीमाथि कारबाहीका लागि निर्देशन दिइसकिएको बताए ।

‘मृतक परिवारलाई उचित राहत प्रदान गरिनेछ’ उनले भने, ‘२१औँ शताब्दीमासमेत जातीय सद्भावविरूद्धका यस्ता घटना हुनु दुःखद् छन् । आम नागरिकमा जातीय सद्भाव र एकता कायम राख्न अपिल गर्दछु ।’ मुख्यमन्त्रीले कर्णाली प्रदेशसभामा रूकुम घटनामा पीडितलाई राहतको घोषणा गरे पनि के राहत दिने भन्ने विषयमा कुनै खुलाएनन् ।