जनकपुर, ८ जेठ-रौतहटमा एउटा पोखरीको डिलमा १० लाख १० हजार रूपैयाँ बरामत गरिएको छ । जिल्लाको इशनाथ नगरपालिकाको परोहा डुमरीयास्थित पोखरीको डिलमा छरिएको अवस्थामा प्रहरीले १० लाख १० हजार रुपैयाँ बरामद गरेको हो ।

डुमरिया माईस्थान चोकसँगै रहेको पोखरीछेउमा २ जना व्यक्ति प्रहरीलाई देखेर भागेको र सो स्थानमा पैसा छरिएको अवस्थामा फेला परेको जिल्ला प्रहरी कार्यालय रौतहटले जनाएको छ । उक्त रकम उनीहरूकै हुनुपर्ने प्रहरीको दाबी छ ।

ना५४प २११६ नम्बरको मोटरसाइकलमा सवार २ जनालाई इशनाथ नगरपालिका कार्यालय अगाडि गस्तीमा रहेको प्रहरीले रोक्न खोजेको थियो । तर, उनीहरू रोकिएनन् । प्रहरीले पछ्याउन थालेपछि डुमरिया माईस्थान चोकसँगै रहेको पोखरीको छेउमा उनीहरू मोटरसाइकल छोडेर भागेको बताइएको छ ।

त्यहाँबाट बरामद रकम ईशनाथ नगरपालिकाका नगर प्रमुखको रोहबरमा गन्न लगाएाौँ १० लाख १० हजार रुपैयाँ रहेको पाइएको औरैयाका प्रहरी सहायक निरीक्षक ललितकुमार साहले बताए ।

बरामद भएको रकम र मोटरसाइकल प्रहरी चौकी औरैयामा राखिएको छ । फरार व्यक्तिहरूको पहिचान हुन सकेको छैन । भारतसँग सीमा जोडिएको रौतहटका औरैयाबाट ठूलो परिमाणको रकम बरामद हुनुले यो क्षेत्रमा हुण्डी कारोबार मौलाएको संकेत मिलेको स्थानीय बताउँछन् ।