बुटवल, ७ जेठ-कोरोनाको इपीसेन्टर बनेको बाँकेको नरैनापुरमा रहेका कोरोना संक्रमितलाई नेपालगञ्ज ल्याउने तयारी गरिए पनि स्थानीयले विरोध जनाएका छन् ।

नरैनापुरमा सोमबार संक्रमण पुष्टि भएका ५७ जनामध्ये ३४ जनालाई कोहलपुरको कृषि विकास बैंकको तालिम केन्द्रमा ल्याउन खोज्दा त्यहाँका स्थानियहरूले विरोध जनाएका छन् । नरैनापुरकै स्थानीयले पनि कोहलपुर आइसोलेसनमा लैजान लागेको भन्दै विरोध गरेका थिए । बाँकी २५ जनालाई लायन्स डेन्टल अस्पतालमा लैजाने तयारी गरिएको थियो ।

कोहलपुर–८ स्थित कृषि विकास बैंकको तालिम केन्द्रमा यसअघि नै भारतबाट आएका २५ जनालाई क्वारेन्टाइनमा राखिएको छ । त्यहाँ रहेकाहरूलाई बागेश्वरी बहुमुखी क्याम्पसमा लैजाने र नरैनापुरका संक्रमित त्यहाँ राख्न खोज्दा क्वारेन्टाइनमा रहेकाहरूले विरोध जनाएका हुन् । संक्रमण भएको २४ घण्टा बितिसक्दा समेत उनीहरूको व्यवस्थापन हुन नसक्दा जोखिम बढेको छ ।

प्रमुख जिल्ला अधिकारी कुमारबहादुर खड्काले विहानै नरैनापुरका संक्रमित ल्याउनका लागि एम्बुलेन्स पठाउँदा संक्रमित नेपालगञ्ज आउन नमानेको बताए । उनले संक्रमितलाई ल्याउन थप सुरक्षाकर्मीसहित एम्बुलेन्स नरैनापुरमा पठाइएको बताए ।