काठमाडौं, १ जेठ-अख्तियार दुरुपयोग अनुसन्धान आयोगले नेपाल विद्युत् प्राधिकरण रत्नपार्क वितरण केन्द्रका इलेक्ट्रिकल सुपरभाइजर कैलाशप्रसाद दाहालविरुद्ध मुद्दा दायार गरेको छ । अख्तियारले बिहीबार विशेष अदालतमा उनीविरुद्धको मुद्दा दायार गरेको हो ।

रत्नपार्क वितरण केन्द्रका इलेक्ट्रिकल सुपरभाइजर दाहालले नयाँ क्षमता वृद्धिको मिटर जडानका लागि नियमानुसार राजस्व तिरी प्रक्रिया अगाडि बढाउँदा झन्झटिलो हुन्छ भनी काममा आलटाल गरेको गुनासो अख्तियारमा परेका आधारमा अख्तियराको टोलीले घूससहित नियन्त्रणमा लिएको छ । अख्तियारका अनुसार दाहाललाई सेवाग्राहीसँग २० हजार घूस लिइसकेको अवस्थामा नियन्त्रणमा लिएको बताएकाे छ।

दाहालले सेवाग्राहीको काम छिट्टो गरिदिने प्रयोजनका लागि २० हजार  रूपैयाँ घूस लिएको स-प्रमाण पुष्टि भएको भन्दै अख्तियारले २० हजार बिगो दाबीसहित भ्रष्टाचार निवारण ऐन, २०५९ को दफा ३ को बमोजिमको कारबाहीको माग गरेको छ  । अनुसन्धानका क्रममा उनलाई ४० हजार धरौटी लिई तारेखमा राखेकोमा अख्तियारले कसुरको अनुसन्धानसम्बन्धी नियमावलीबमोजिम बिहीबार मुद्दा दायार गरेको छ ।