काठमाडाैं, ३० वैशाख-सत्तारूढ दल नेपाल कम्युनिस्ट पार्टी (नेकपा)ले स्थायी कमिटी बैठक बोलाएको छ ।स्थायी कमिटी सदस्य मणि थापाका अनुसार बुधबार बिहान ११ बजे पार्टी कार्यालय धुम्बाराहीमा बैठक बस्नेछ । सरकारले नीति तथा कार्यक्रम ल्याउनुभन्दा २ दिनअघि नेकपाले स्थायी कमिटी बैठक बोलाएको हो । २ जेठमा सरकारले संसदमा नीति तथा कार्यक्रम पेस गर्दैछ ।

यसअघि २५ वैशाखमा बस्ने भनिएको बैठक अन्तिम समयमा स्थगित गरिएको थियो । २४ गते सचिवालय बैठक चलिरहेका बेला प्रधानमन्त्री ओली बीचमै उठेर हिँडेपछि स्थायी कमिटी बैठक अनिश्चित बनेको थियो ।

त्यसपछि दुई अध्यक्षबीच पटक–पटक छलफल भएको थियो । स्रोतका अनुसार सोमबार दुई अध्यक्षबीच भएको छलफलमा स्थायी कमिटी बैठक बोलाउने सहमति बनेको हाे ।

अध्यक्ष दाहालले नेतृत्वसँग असन्तुष्ट सांसदले नीति तथा कार्यक्रमको विरोध गर्न सक्ने औँल्याएपछि ओली बैठकका लागि तयार भएका बताइएको छ । भीम रावल, देव गुरुङलगायतका नेता नीति तथा कार्यक्रमको विरोध गर्ने तयारीमा छन् ।