काठमाडाैं, २९ वैशाख-संसदीय समितिले कोरोना भाइरस रोकथाम तथा नियन्त्रणका लागि पीसीआर प्रविधिबाट गरिने परीक्षणलाई वृद्धि गरी लकडाउन खुकुलो पार्न सरकारलाई निर्देशन दिएको छ ।

प्रतिनिधिसभाकाे राज्य व्यवस्था तथा सुशासन समितिको सोमबार बसेको बैठकले कोरोना भाइरस राेकथामका लागि पीसीआर प्रविधिबाट गरिने परीक्षण बढाउन सरकारलाई निर्देशन दिएको हो ।

समितिले स्थानीय स्तरमा निर्माण गरिएका क्वारेन्टाइनलाई मापदण्डअनुसार बनाउनुपर्ने, आइसोलेसन बेडहरू पर्याप्त मात्रामा निर्माण गर्नुपर्ने, किसानहरूलाई मल तथा बीउबिजन उपलब्ध गराउनु पर्ने र उत्पादित वस्तु बजारसम्म पुर्‍याउन सहज वातावरण बनाउन पनि निर्देशन दिएको छ ।

विदेशमा अलपत्र परेका कामदार र भारतसँगको सीमावर्ती क्षेत्रमा बसेका मानिसहरूलाई संक्रमण नियन्त्रणसम्बन्धी विश्वव्यापी मापदण्डअनुसार व्यवस्थित रूपमा घर फर्कने व्यवस्था मिलाउनसमेत निर्देशन दिइएको समिति सभापति शशी श्रेष्ठले जानकारी दिइन् ।

विदेशमा रहेका नेपालीहरूको समस्या समाधानका लागि प्रधानमन्त्रीस्तरबाटै सम्बन्धित देशमा कुरा भइसकेको र कुनै समस्या भए सम्बन्धित देशले नै समाधान गर्ने उपप्रधानमन्त्री एवम् कोरोना भाइरस नियन्त्रण तथा रोकथाम उच्चस्तरीय समन्वय समितिका संयोजक इश्वर पोखरेलले बताए ।

गृह मन्त्रीरामबहादुर थापाले भारतीय सीमा पारी करिब २१ सय नेपाली क्वारेन्टाइनमा रहेको जानकारी दिए । स्वास्थ्यमन्त्री भानुभक्त ढकालले सरकारसँग उपलब्ध भएका परीक्षण किटहरूको आधारमा कन्ट्याक ट्रेसिङको मापदण्ड बनाई परीक्षण भइरहेकाे जानकारी गराए । उनले केही दिनयता पीसीआर प्रविधिबाट गरिने परीक्षणलाई पनि बढाइएको बताए ।