काठमाडौं, २८ वैशाख-कोभिड-१९ को जोखिम औँल्याउँदै सरकारले अन्तर्राष्ट्रिय उडान बन्द गरे पनि लकडाउनको अवधिमा झण्डै ५ हजार विदेशी नागरिक आआफ्नो मुलुक फर्केका छन् ।

नेपालले अन्तर्राष्ट्रिय उडान बन्द गरेको अवस्थामा चार्टर फ्लाइटमार्फत् शनिबारसम्म विभिन्न मुलुकका ४ हजार ८७४ विदेशी नागरिक आआफ्नो मुलुक फर्किएका हुन् ।

सरकारले ११ चैतदेखि लकडाउन गरे पनि विदेशी मुलुकले चार्टर फ्लाइटमार्फत् आफ्ना नागरिक उद्धार गरी लैजान सकिने निर्णय गरेको थियो । सो अवधिमा ५१ वटा विशेष उडानमार्फत् ६० भन्दा बढी मुलुकले आफ्ना नगरिकलाई उद्धार गरी लगेका अध्यागमन विभागले जनाएको छ । सो अवधिमा १७ कार्गो र ३४ यात्रु उडान भएको थियो ।

नेपाल भ्रमण गर्न आएका पर्यटक, नेपालमा रहेका विभिन्न मुलुकका कूटनीतिक नियोगका कर्मचारी, दातृ निकाय तथा विकास साझेदारका विभिन्न परियोजनामा काम गर्ने नागरिकलाई उद्धार गरेर लगेको बताइएको छ । यस अवधिमा सबैभन्दा बढी संयुक्त अधिराज्यका ६ सय ६६ नागरिक स्वदेश फर्केका विभागका निर्देशक रामचन्द्र तिवारीले जानकारी दिए ।

यसैगरी जर्मनीका ६ सय ५६, अमेरिकाका ५ सय ३५, फ्रान्सका ४ सय २५, क्यानाडाका ३ सय २२, अष्ट्रेलियाका २ सय ३६, नेदरल्यान्डका १७६, दक्षिण कोरियाका १६३, जापानका १६२, स्पेनका १३४, स्विट्जरल्यान्डका ११४, इटालीका ११३, रसियाका १०४, पोल्यान्डका ९२, अस्ट्रियाका ८४, स्विडेनका ७४, बेल्जियमका ६५, श्रीलंकाका ५७, चेक रिपब्लिकका र मलेसियाका ४५/४५ तथा भूटानका ४४ नागरिक स्वदेश फर्केका छन् ।

यस्तै डेनमार्कका ४३, फिनल्यान्डका ४२, आयरल्याण्डका ४०, न्युजिल्यान्डका ३८, युक्रेनका ३७, थाइल्याण्डका ३३, बङ्गलादेशका ३२, ब्राजिलका ३१, हङ्गेरीका २७, पोर्चुगलका २२, नर्वे र इजरायलका २१/२१, चीन र भारतका २०/२०, सिङ्गापुरका १९, माल्दिभ्सका १२, दक्षिण अफ्रिकाका ११, मेक्सिको र रोमानियाका सातरसात, स्लोभाकियाका ६, बेलारुसका ५, अर्मेनिया, लिथुवानिया, युएनओ, लाटभिया र बुल्गेरियाका ४/४ नागरिक फर्किएका विभागले जनाएको छ ।

यस्तै, लक्जेमबर्ग, मङ्गोलिया र आइसल्यान्ड ३/३, अर्जेन्टिना, चिली, ग्रिस, इरान, माल्टा, स्लोभानिया, ताइवान, संयुक्त अरब इमिरेटस् र यमनका २/२ तथा अन्य मुलुकका १८ नागरिक पनि लकडाउनको अवधिमा स्वदेश फिरेका छन् । रासस