काठमाडौं, २६ वैशाख-सत्तारूढ दल नेकपाका नेताहरू बालुवाटारमा छलफल गरेका छन् । बजेट अधिवेशन सुरु हुनुभन्दा पहिला संसदीय दलको बैठक बस्ने चलन छ । तर, अहिले त्यस्तो बैठक बस्न सम्भव नभएकाले कार्यकारी अध्यक्ष पुष्पकमल दाहाल ‘प्रचण्ड’, महासचिव विष्णु पौडेल, दलका उपनेता सुबास नेम्वाङ, प्रतिनिधिसभाका प्रमुख सचेतक देव गुरुङ, सचेतक शान्ता चौधरी, राष्ट्रियसभाका संसदीय दलका नेता दीनानाथ शर्मालगायतका नेताहरू छलफल भएको नेम्वाङले बताए ।
अहिले कोरोना भाइरसको महामारीका कारण सोसियल डिस्टेन्स कामय गर्नुपर्ने र त्यो संसदीय दलको कार्यलय लोत्सेहलमा सम्भव नभएकाले केही नेताहरू र प्रतिनिधि र राष्ट्रियसभाका नेताहरूबीच छलफल भएको नेम्वाङले बताए ।
‘बजेटको समय छ त्यसको लागि छलफल गर्नुपर्ने हुन्छ । प्रिबजेटको लागि अहिल छलफल जारी छ । अन्य विषयमा पनि कसरी जाने भन्ने विषयमा छलफल भएको हो’ उनले भने ‘बजेट अधिवेशनमा सांसदहरुलाई प्रभावकारी रुपमा प्रस्तुत हुन निर्देशन दिने कुरा भएको छ ।’
सरकारको नीति तथा कार्यक्रम पनि आउने भएकाले संसदमा प्रभावकारीता देखाउनु पर्ने भएकाले यसका लागि नेकपा सांसदहरूलाई नीति तथा कार्यक्रम र बजेट पारित गर्न दलको नेताद्वारा आग्रह गर्ने कुरा भएको नेम्वाङले बताए ।
आजै अध्यक्षद्वयबीच पनि छुटै कुराकानी भएको नेम्वाङले बताए । ‘कुराकानी कुनकुन विषयमा भयो भन्ने जानकारी नभए पनि छुटै बस्नु भएको थियो । कुरा के भयो जानकारी भएन’ नेम्वाङले भने ।
पछिल्लो समयमा नेकपामा अध्यक्षद्वय बीच नै सहमति हुन सकेको छैन । हिजो बिहीबार बस्ने भनेको स्थायी कमिटी बैठक पनि बस्न सकेको छैन । अध्यक्षद्वय बीच नै एजेण्डा के के हुने भन्ने विषयमा नै सहमति हुन नसकेपछि स्थायी कमिटीको बैठक बस्न सकेको छैन । हिजै १८ जना स्थायी कमिटी सदस्यले पार्टी कार्यलय धुम्बाराहीमा बैठक बसेर प्रचण्डलाई भेटेका छन् । यसअघि स्थायी कमिटी बोलाउनुपर्ने नेताहरूको माग अनुसार २ अध्यक्षले सल्लाह गरेर बैठक बोलाउने अध्यक्ष प्रचण्डले बताएका थिए ।