काठमाडौं, १९ वैशाख-नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डसँग खुमलटारमा नेपालका लागि चिनियाँ राजदूत हाउ यान्छीले भेटवार्ता गरेकी छन्। प्रचण्ड निवासमा शुक्रबार बिहान भएको भेटवार्तामा कोरोनाभाइरस रोकथामका लागि भइरहेको प्रयासबारे कुराकानी भएको बताइएको छ ।

चीनले गरेको सहयोगको प्रसंशा गदै प्रचण्डले राजदूत यान्छीलाई धन्यवाद भन्दै आगामी दिनमा पनि सहयोगको अपेक्षा गरेको प्रचण्डको सचिवालयले बताएको छ । जवाफमा राजदूत यान्छीले चीन नेपाललाई आवश्यक सहयोग गर्न तयार रहेको बताएकी थिइन् ।

चीनले नेपाललाई कोरोेना रोकथाम तथा उपचारका सहयोग उपलव्ध गर्दै आएको छ । पछिल्लो पटक नेपाली सेनाले जिटुजी प्रक्रियाबाट ३ सय ४१ टन औषधि ल्याउने सम्झौतामा हस्ताक्षर गरिसकेको छ ।

कोरोना भाइरस रोकथामका लागि सहयोग गर्न आग्रह गर्दै अध्यक्ष प्रचण्डले चिनियाँ राष्ट्रपति सि चिनपिङलाई पत्र नै पठाएका थिए । आज बिहान नेकपाका वरिष्ठ नेता माधवकुमार नेपाल र राजदूत यान्छीबीच पनि भेटवार्ता भएको छ ।