जनकपुर, १९ वैशाख-लकडाउनका बेला प्रदेश–२ को वन क्षेत्रमा जंगली जनावरको सिकार र काठको तस्करी बढेको छ । डिभिजन वन कार्यालय सप्तरीले सक्रियता बढाएपछि सिकारी र तस्कर पक्राउ पर्न थालेका छन् ।

यसैबीच, जिल्लाको अग्नीसाइर कृष्णासवरण गाउँपालिका–५ स्थित महुली खोलाबाट मारेको रतुवा मृगसहित २ जनालाई पक्राउ गरिएको छ । गस्तीमा रहेका सशस्त्र वन रक्षकले गोलीको आवाज सुनेपछि त्यस क्षेत्रमा जाँदा मृग मारेर लैजाँदै गर्दा २ जनालाई पक्राउ गरिएको डिभिजन वन कार्यालय सप्तरीका प्रमुख सन्तोषकुमार झाले जानकारी दिए ।

मृगलाई मार्ने समूहमा रहेका केही हतियारधारी व्यक्ति भने भागेका छन् । उनीहरुको खोजी भइहरेको प्रमुख झाले बताए । मृगसहित पक्राउ गरिएका दुबै जना उदयपुरको भुल्के र जोगीदह क्षेत्रका बासिन्दा हुन् । उनीहरुलाई डिभिजन वन कार्यालय अन्तर्गतको महुली सवडिभिजनमा राखिएको छ ।

लकडाउन अवधिमा प्रदेश–२ मा चोरीसिकारी तथा वन तस्करीमा संग्लन ३५ जना पक्राउ परिसकेको छन् । अहिले प्रदेशका ८ वटै जिल्लामा डिभिजन वन कार्यालयले विशेष सर्तकर्ता अपनाएको प्रदेश वन निर्देशनालयका अधिकृत सुरेश शर्माले जानकारी दिए ।

यसैबीच, सप्तरीमा अवैध रुपमा मारिएको बँदेल सुरक्षाकर्मी समेतले खाएको खुलेको छ । लकडाउनकै क्रममा केही दिन अघि सप्तरीको हनुमाननगर कंकालिनी नगरपालिकाको भारदह क्षेत्रमा एउटा जंगली बँदेल स्थानीयले मारेको र त्यसको मासु भारदहस्थित सशस्त्र प्रहरीको पोष्टमा रहेका सुरक्षाकर्मीसहित अन्यत्र पनि भाग लगाएर वितरण गरिएको थियो ।

भारदहस्थित सशस्त्र प्रहरी पोष्टका सशस्त्र प्रहरी निरीक्षक वैद्यनाथ झाले बँदेल कहाँ र कसरी मारिए भन्ने कुरा थाहा नभए पनि आफूलाई ७ किलो मासु आएको र २०/२२ जना सुरक्षाकर्मी मिलेर खाएको स्वीकार गरेका छन् ।