काठमाडौं, १८ वैशाख-रोल्पामा बम विष्फोट हुँदा ४ बालबालिकाको ज्यान गएको छ । जिल्लाको त्रिवेणी गाउँपालिका–७ गैरीगाउँमा बुधबार बेलुका बालबालिकाले नचिनेर पुरानो बम खेलाउने क्रममा विष्फोट भएको जिल्ला प्रहरी कार्यालय रोल्पाका प्रहरी प्रमुख चित्रबहादुर गुरुङले जानकारी दिए ।

बम विष्फोटमा परी चारै बालबालिकाको घटनास्थलमै ज्यान गएको त्रिवेणी गाउँपालिका–२ का वडाध्यक्ष कविराज बुढाले जानकारी दिए।उनका अनुसार मृत्यु हुनेमा १४ वर्षीय नोखिराम डाँगी, वर्ष ११ का बिमला खत्री, १३ वर्षीय गौरव नेपाली र ५ वर्षका विजय खत्री रहेका छन् ।

बाख्रा चराउन गएका उनीहरुको बेलुका साढे ६ बजे बिष्फोटमा परी मृत्यु भएको प्रहरीले जनाएको छ । अनुसन्धानका घटनास्थलमा अहिले प्रहरी चौकी नुवागाउँको टोली त्यहाँ पुगेको र जिल्ला प्रहरी कार्यालयबाट पनि प्रहरी प्रमुखसहितको टोली गइरहेको प्रहरी नायब उपरिक्षक गुरुङले बताए ।

सशस्त्र द्वन्द्वका समयमा तत्कालीन विद्रोही माओवादीले लुकाएर राखेको बम बालबालिकाले खेल्ने क्रममा भेट्टाएको र विस्फोट भएको हुनसक्ने आशंका गरिएको छ । घटनाको विस्तृत विवरण आउन बाँकी छ ।