एजेन्सी, बैशाख १५-कोरोना भाइरसको महामारीसँग ठप्प बनेको युरोपेली फुटबल पुनः सुरु हुने भएका छन् । कोरोना भाइरसका कारण गत फेब्रुअरीदेखि नै प्रभावित बनेको इटलियन सिरी ए का क्लबहरुले लकडाउन खुकुलो भएसँगै प्रशिक्षण सुरु गर्ने भएका छन् ।

लकडाउन खुकुलो भएपछि क्लबहरु आगामी ४ मेदेखि प्रशिक्षण चलाउन सक्नेछन् । प्रधानमन्त्रीले कोरोना भाइरस लकडाउन खुकुलो पार्ने प्रक्रियाको पहिलो चरणको घोषणा गरेसँगै ४ मेदेखि खेलाडीहरु प्रशिक्षणमा सहभागी हुन पाउनेछन् भने १८ मेदेखि टिम प्रशिक्षण सुरु गर्न पाइनेछ ।

अगस्टको सुरुवातमा अन्त्य गर्ने तयारी गरिएको सिरी एका बाँकी खेलहरु मेको अन्तिम साता या जुनको पहिलो सातामा हुने अपेक्षा गरिएको छ । यद्यपि युरोपमा कोरोना भाइरसका कारण सबैभन्दा बढीले ज्यान गुमाएको इटलीका रंगशालाहरु कहिलेबाट खोल्ने भन्ने औपचारिक घोषणा भइसकेको छैन ।