मोरङ, ११ वैशाख-प्रदेश–१ मा कोरोना सङ्क्रमितको संख्या २८ पुगेको छ । पछिल्लो कोभिड–१९ परीक्षणमा २ महिलामा संक्रमण देखिएसँगै पोजिटिभको संख्या २८ पुगेको प्रदेश–१ मुख्यमन्त्री तथा मन्त्रिपरिषद्को कार्यालयमा स्थापित सूचना डेस्कले जनाएको छ ।

पोजिटिभ पुष्टि भएकामध्ये १६ नेपाली नागरिक र १२ जना भारतीय छन् । उनीहरुकोे उदयपुरको त्रियुगा नगरपालिका–३ भुल्केबाट थ्रोट स्वाब नमुना सङ्कलन गरी परीक्षण गरिएको हो ।

उनीहरुको उपचार विराटनगर–१० स्थित कोशी अस्पताल कोभिड–१९ उपचार केन्द्रमा भइरहेको र स्वास्थ्य अवस्था सामान्य रहेको अस्पतालले जनाएको छ ।

प्रदेशमा हालसम्म ८ सय २३ जनाको स्वाब पीसीआर विधिबाट परीक्षण गरिएको छ भने द्रुत गतिको आरडीटी विधिबाट ३ हजार ५९२ जनाको रगतको नमुना सङ्कलन गरिएको छ । प्रदेश अन्तर्गतका विभिन्न स्थानमा रहेका आइसोलेसन शय्यामा बस्नेको संख्या ३४ रहेको छ भने क्वारेन्टाइनमा १ हजार ७० छन् । रासस