जनकपुरधाम, ८ वैशाख-जनकपुरधामका एक मुस्लिम युवकको समाजसेवाबारे निकै चर्चा भइरहेको छ । लकडाउनका बेला गरिबलाई राहत दिने नाममा सरकारी पक्ष उदासीन रहेको वेला स्थानीय समाजसेवीले गरिबको पीडामा मलहम लगाउन काम गरेका छन् ।

कोरोना भाइरसका कारण विश्व नै संकटमा परेका बेला केही सीमित व्यक्ति दिनरात गरिब तथा विपन्न दलितलाई राहत वितरणमै लागेका छन् । यस्ता राहत अभियान चलाउने प्रमुख व्यक्तिमा जनकपुरधाम ८ का साजिद हुसैन पनि एक रहेका छन् । राहतलाई लिएर साजिदको अहिले निकै चर्चा रहेको छ । अहिलेसम्म २२ सय जना परिवारलाई राहत दिएका छन् । मिशन दहेजमुक्त समाज प्रदेश २ नामको संस्थाका माध्यमले यो अभियान उनको चल्दै छ । राहत वितरणको नेतृत्व साजिदले गरिरहेका छन् ।

बिहानदेखि साँझसम्म राहत वितरण गर्नमै व्यस्त देखिन्छन् । मोहम्मद जब्बार नूरी, मोहम्मद गफार नूरीलगायतको टोली नै संकटमा परेकाहरूलाई राहत वितरणमा खटिएको छ । गरिबको नामावली संकलन गर्ने र वितरण गर्ने आफूहरूको दिनचर्या रहेको साजिदले बताए ।

एक सातापछि मुस्लिमहरूको महत्वपूर्ण पर्व रमजान सुरु हुँदैछ । सो पर्वको बेला गरिब मुस्लिमलाई १५ दिनको खर्च दिने पनि उनीहरूले तयारी गरिरहेका छन् । दाता पनि केही अगाडि आएको उनले बताए ।