काठमाडाैं, ७ वैशाख-अर्थमन्त्री डा. युवराज खतिवडाले अहिले बजार व्यवस्थित भएको दाबी गरेका छन् । उनले आइतबार नेपाल चेम्बर अफ कमर्सका प्रतिनिधिहरूको छलफलमा यस्तो बताएका हुन् ।

बजारमा कालो बजारी हुन्छ कि भन्ने शंका गरिएको अवस्थामा व्यवसायीले यसलाई गलत सावित गरेको अर्थमन्त्री खतिवडाको भनाइ छ । ‘सुरु-सुरुमा केही दिन आपूर्तिमा समस्या हुन्छ कि, खाने मान्छेले समान पाउँदैनन् कि, कालो बजारी हुन्छ कि जस्ता तर्क आउने गरेका थिए,’ व्यवसायीहरूसँगको भेटमा अर्थमन्त्री खतिवडाले भने, ‘यी तर्कलाई तपाईंहरूले गलत सावित गरिसक्नुभएको छ ।’

उनले अहिले जिम्मेवार व्यवसायको गति अघि बढेको भन्दै निरन्तरता दिनका लागि आग्रह गरेका छन् । कतिपय वस्तुहरूमा भने स्वास्थ्य तथा अत्यावश्‍यक सामग्रीमा कालो बजारी भएको गुनासो स्वयम व्यवसायीहरूले बताएका छन् ।

कालो बजारी गरेको आरोपमा नेपाल उद्योग परिसंघका उपाध्यक्ष सुलभ अग्रवाल अहिले थुनामा छन् । अहिले पनि बजारलाई अति आवश्‍यक परिरहेको स्वास्थ्य सामाग्री पीपीई, मास्क तथा थर्मल गन ३ गुनासम्म महँगो मूल्यमा किन्नुपरेको स्वास्थ्य क्षेत्रमा आवद्धहरूको गुनासो छ ।