बीमा समितिले कोरोना भाइरस (कोभिड १९) बाट रक्षावरण हुने गरी बीमालेख जारी गर्ने निर्णय गरेको छ ।हाल विद्यमान रहेको घातक रोगसरहको बीमालेखअनुसार हुनेगरी कोरोना भाइरससम्बन्धी बीमालेख जारी गर्न सबै निर्जीवन बीमा कम्पनीहरूको बीमा पुलमार्फत निर्देशन गरिएको बीमा समितिका कार्यकारी निर्देशक राजुरमण पौडेलले जानकारी दिए ।

कोरोना भाइरसलाई लक्षित गर्दै १ लाख र ५० हजार रूपैयाँ गरी २ वटा बीमालेख जारी गर्न सकिने व्यवस्था गरिएको पौडेलले बताए । श्रेणी ‘क’ र ‘ख’ गरी जारी हुने बीमालेखमा १ लाख रुपैयाँसम्मको बीमा गर्दा १ हजार रुपैयाँ प्रिमियम शुल्क लाग्ने र परिवारका सबै सदस्यहरूको बीमा गर्दा प्रतिव्यक्ति ६ सय रुपैयाँ बीमा शुल्क लाग्ने व्यवस्था गरिएको उनले बताए ।

त्यस्तै, श्रेणी ‘ख’ अन्तर्गत ५० हजार रुपैयाँसम्म बीमा गर्न सकिने र सोबापत प्रतिव्यक्ति ५ सय बीमा शुल्क तोकिएको छ । यसअन्तर्गत परिवारका सबै सदस्यको बीमा गर्न चाहेमा थप ३ सय बीमाशुल्क निर्धारण गरिएको पौडेलले बताए । पोलिसीअन्तर्गत बीमा गर्ने व्यक्तिलाई कोरोना लागेको भनी पीसीआर परीक्षणमा पोजेटिभ देखिनेबित्तिकै बीमा रकम दाबी भुक्तानी लिन सकिनेछ । दाबीका लागि बीमा सुरु भएको १५ दिनसम्म प्रतीक्षा अवधि रहनेछ ।