नेपाल कम्युनिस्ट पार्टी (नेकपा) बेलका नगर कमिटीले विपन्न परिवार र दैनिक ज्यालादारी मजदुरका लागि साढे ८ लाख रुपैयाँ सहयाेगस्वरूप उपलब्ध गराएको छ । लकडाउन लम्बिरहँदा समस्या परेका विपन्न नागरिकलाई खाद्यान्न तथा अत्यावश्यक सामाग्री दिलाउन नेकपाले बेलका नगरपालिकामार्फत ८ लाख ५० हजार रुपैयाँ सहयोग रकम उपलब्ध गराएको हो ।

सोमबार रामपुरस्थित नगरपालिका कार्यालय पुगेर नेकपा नगर कमिटी अध्यक्ष मनोज तामाङसहितका पदाधिकारी र सदस्यले नगरप्रमुख दुर्गाकुमार थापालगायतका जनप्रतिनिधिलाई सहयोग रकम हस्तान्तरण गरे ।

नेकपाले उक्त रकम आफ्ना कार्यकर्ताबाट उठाएको हो । नेकपा नेता रमण भट्टराईले भने, ‘पार्टीका कार्यकर्ता, शुभेच्छुकले स्वइच्छाले विपन्न नागरिकका लागि यो सहयोग हाम्रो पार्टीमार्फत गर्नुभएको हो, लक्षित वर्गसम्म पुग्छ भन्ने विश्वासका साथ नगरपालिकालाई हस्तान्तरण गरेका छौँ ।’

लकडाउन अनिश्चित बनेसँगै नेकपाले नगर कमिटी सचिव गणेश बस्नेतको संयोजकत्वमा राहत तथा विपद व्यवस्थापन समिति गठन गरेको थियो । १५ दिनभित्र उक्त समितिले साढे ८ लाख रकम संकलन गरेको हो ।