काठमाडौं, ३० चैत-नेपालमा थप ३ जनाको कोरोना ‘पोजेटिभ’ देखिएको छ । हेटौँडामा परीक्षण गर्दा आशंका गरिएका ३ जनामा काठमाडौंको टेकु अस्पतालको ल्याबमा परीक्षण गराउँदा पुनः ‘पोजेटिभ’ देखिएको हो ।

‘हिजो दिउँसो ११ बजेको रिपोर्ट पोजेटिभ देखिएपछि पुनः गरियो, पुनः पोजेटिभ देखिएको छ,’ राष्ट्रिय जनस्वास्थ्य प्रयोगशाला स्राेतले भन्यो ।स्वास्थ्य मन्त्रालयले केही बेरमा पत्रकार सम्मेलन गरेर आधिकारिक जानकारी दिने भएको छ ।

बागमती प्रदेशको राजधानी हेटौँडाको किटजन्य रोग अनुसन्धान तालिम केन्द्रमा शुक्रबार ३५ जनाको कोरोना परीक्षण गरिएकोमा ३ जनाको नतिजा भने ‘पोजेटिभ’ हो वा होइन भन्ने निर्क्यौल गर्न नसकेपछि काठमाडौंको राष्ट्रिय जनस्वास्थ्य प्रयोगशालामा पठाइएको थियो ।

प्रयोगशालाले पुनः परीक्षण गर्दा रिपाेर्ट ‘पोजेटिभ’ आएको जनाएको हो । यी तीनै जनाको स्वाब पर्साबाट ल्याइएको हो । उनीहरू तीनै जनालाई आइसाेलेसनमा राखिएको छ ।

नयाँ संक्रमितको विषयमा स्वास्थ्य मन्त्रालयले पत्रकार सम्मेलन गरेर जानकारी दिने तयारी गरेको छ ।कोरोना ‘पोजेटिभ’ देखिएका तीनै जना नागरिक मस्जिदमा बस्दै आएका थिए ।

वीरगन्ज महानगरपालिका–२, छपकैयास्थित श्रीराम हलअगाडिको मस्जिदमा बस्दै आएका ३ जना भारतीय नागरिक भएको बताइए पनि पुष्टि हुन बाँकी छ । उनीहरूलाई शुक्रबारदेखि नारायणी अस्पतालको आइसोलेसन कक्षमा राखिएको छ ।