एजेन्सी, चैत ३०–साउदी अरबले मुलुकभर लगाएको कर्फ्यू अनिश्चितकालसम्मका लागि बढाउने निर्णय गरेको छ । कोरोना भाइरस (कोभिड- १९) को नियन्त्रणका लागि भन्दै साउदी सरकारले अर्को सूचना नआएसम्मका लागि कर्फ्यू जारी राख्ने निर्णय गरेको हो ।

साउदी अरबका राजा सलमान बिन अब्दुल्लाजिज अल साउदले गत २३ मार्चदेखि मुलुकभर बेलुका ७ बजेदेखि बिहान ६ बजेसम्म लगाइएको २१ दिने कर्फ्यू बढाउन निर्देशन दिएका हुन् ।

गत साता साउदीले रियादलगायतका मुख्य सहरमा २४ सै घन्टा कर्फ्यु लगाउनेगरी समय बढाएको थियो । यी शहरमा मानिसहरूलाई अत्यावश्यक सामग्री किन्नका लागि बिहान ६ बजेदेखि दिउँसो ३ बजेसम्म बाहिर निस्किन दिने गरिएको छ ।

साउदीको गृहमन्त्रालयले अर्को सूचना जारी नभएसम्मका लागि देशका १३ वटै प्रान्तमा आवतजावतमा रोक लगाइएको जनाएको छ । साउदी अरबमा हालसम्म कोरोना भाइरसबाट ४ हजार ३३ जना संक्रमित भएका छन् भने ५२ जनाको मृत्यु भइसकेको छ ।