बाँके, २९ चैत-बाँकेमा कोभिड–१९ को र्‍यापिड डायग्नोष्टिक टेष्ट (आरडिटी) किटबाट परीक्षण सुरु भएको छ ।भारतलगायत अन्य देशबाट आएर जिल्लाका विभिन्न क्वारेन्टाइनमा बसेका व्यक्तिमा आरडिटी किटका माध्यमबाट शुक्रबारदेखि कोरोना परीक्षण सुरु गरिएको स्वास्थ्य कार्यालय बाँकेका कोरोना फोकल पर्सन नरेश श्रेष्ठले बताए ।

उनका अनुसार बैजनाथ गाउँपालिकाको एकान्तवासमा बसेर १४ दिनको अवधि गुजारेका दुईमा किटबाट परीक्षण गर्दा रिपोर्ट नेगेटिभ देखिएको छ । ती व्यक्तिको परीक्षण गरेर नेगेटिभ देखिएमा घरमा थप सात दिन एकान्तबासमा बस्ने गरी पठाइने छ ।

पोजिटिभ नतिजा आएमा भने एकान्तबासमा राखी पुनः पिसिआर प्रविधिबाट जाँचका लागि प्रदेश जनस्वास्थ्य प्रयोगशाला बुटवल पठाइने श्रेष्ठले बताए । परीक्षणका लागि बाँकेमा पाँच सय थान आरडिटी आएको छ । बाँकेमा अहिले ४९१ जना एकान्तबासमा छन् ।

आरडिटी किटबाट परीक्षण शुरु भए पनि लागि पोलिमर चेन रिएक्सन (पीपीआर) यन्त्रबाट भेरी अस्पतालमा कोरोना भाइरस परीक्षण गर्न भने अझै एक हप्ता लाग्ने भएको छ ।

पीसीआर यन्त्रको जडान भइरहेकाले सेवा सञ्चालन गर्न समय लाग्ने भेरी अस्पतालका निमित्त प्रमुख डा. प्रकाश थापाले जानकारी दिए । अझै एक हप्तासम्म यन्त्र जडानका लागि समय लाग्ने उनको अनुमान छ । रासस