नेपाली सेनाले मेडिकल सामग्री खरिद प्रक्रिया अघि बढाएको छ । कोरोना भाइरस (कोभिड- १९)को रोकथामका लागि आवश्यक औषधिदेखि अन्य स्वास्थ्य सामग्री सेनालाई खरिद गर्ने जिम्मा दिएको १० दिनपछि सेनाले मेडिकल सामग्री खरिद प्रक्रिया अघि बढाएको हो ।

यसका लागि नेपाली सेनाले रक्षा मन्त्रालयको अनुमतिले परराष्ट्र मन्त्रालयमार्फत् ५ वटा देशलाई पत्र पठाइसकेको जनाएको छ । सामान खरिद प्रक्रियाका लागि सेनाले पहिलो चरणमा ५ देश चीन, भारत, दक्षिण कोरिया, सिङ्गापुर र इजरायललाई पत्र पठाइएको सेनाका प्रवक्ता सहाक रथी विज्ञानदेव पाण्डेको भनाइ छ ।

पाण्डेका अनुसार पहिलो चरणमा ५ देशमध्ये जुन देशले पहिला सामान उपलब्ध गराउँछ, त्यही देशबाट सामान खरिद हुनेछ । १६ चैतमा बसेको मन्त्रिपरिषद् बैठकले नेपाली सेनामार्फत् सरकार-सरकार (जीटुजी)मार्फत् स्वास्थ्य सामग्री खरिद गर्ने जिम्मा दिएको थियो ।

यसअघि स्वास्थ्य मन्त्रालयले ओम्नी इन्टरनेसनलमार्फत् १ अर्ब रुपैयाँभन्दा बढीको मेडिकल सामग्री ल्याउन सम्झौता गरेको थियो । सम्झौताअनुसार ओम्नी समूहले मेडिकल सामग्री नल्याएको र चीनले अनुदानमा उपलब्ध गराएका उही सामग्रीको तुलनामा १८ गुणासम्म महँगो परेपछि खरिद प्रक्रिया विवादमा परेको थियो ।