कोरोना महामारी नियन्त्रणका लागि गठित निर्देशक समितिले प्रदेश २ भरिमा ५० वटा भेन्टिलेटर र २ वटा कोरोनाको परीक्षण गर्ने मेसिन पिसिआर थप्न निर्देशन दिएको छ । मुख्यमन्त्री लालबाबु राउत संयोजकत्वको निर्देशक समितिले आज सो निर्देशन सम्बन्धित मन्त्रालय र कार्यकारी समितिलाई दिएको छ ।

निर्देशक समितिले दिएको निर्देशनअनुसार प्रादेशिक अस्पताल जनकपुरमा १०, नारायणी उपक्षेत्रीय अस्पताल वीरगंजमा १० र अन्य जिल्ला अस्पतालहरुमा ५/५ भेन्टिलेटर थप गरिने छ भने विरगंज र राजविराजमा पिसिआर मेसिन जडान गरिने छ ।

भेन्टिलेटर र पिसिआर खरिद प्रक्रिया तत्काल शुरु गर्नसमेत निर्देशन दिइएको छ । निर्देशन समितिको आज सम्पन्न बैठकमा विभिन्न मन्त्रालयका सचिवहरुले कोरोना महामारी नियन्त्रण तथा लकडाउनको अवस्थाबारे जानकारी गराएका थिए ।

प्रदेश सरकारको कामको निकै आलोचना भइरहेको वेला आजभोलि मुख्यमन्त्री राउत दैनिक कुनै न कुनै घोषणा गरिरहेका छन् तर, धरातलीय अवस्थामा कुनै सुधार नभइरहेको स्थानीयवासीहरु आरोप लगाइरहेका छन ।