भगवान रामको ससुरालीमा आज रामजन्मोत्सवको कुनै चहल पहल छैन । मन्दिरहरुमा भक्तजनहरुलाई सुरक्षाकर्मीहरुले आउनै दिएका छैनन् । लकडाउनका कारण धेरै मानिस घरबाट बाहिर निस्किएका छैनन् ।

लकडाउनका बाबजूद जो बाहिर आएका छन्, उनीहरुलाई सुरक्षकर्मीले मन्दिरसम्म जान दिइरहेका छैनन् । ‘म त मन्दिरसम्म गएको थिएँ ढोका नै लागेको थियो’, राम युवा कमिटिका पूर्व उपाध्यक्ष परमेश्वर साहले बताए ।

उनले ढोकाकै पूजा गरेर फर्किए । राम मन्दिर र जानकी मन्दिरको मूल ढोकाहरुमा ताल्चा लागेको छ । ‘मानवता बचाउनु छ, घरमा पूजा गर्दापनि हुन्छ,’ धनुषाका प्रहरी नायब उपरीक्षक रामेश्वर कार्कीले भने ।

कोरोना भाइरसका कारण मन्दिरहरुको पूजापाठ निकै प्रभावित भएको छ । हुनत राम जन्मोत्सवसँग जोडिएका पूजाहरु मन्दिरमा गरिने राम मन्दिरका महन्थ राम गिरीले बताए ।

मन्दिर भित्र सबै कार्यक्रम गर्ने तर भक्तजन सहभागी नहुने उनले बताए । यसअघिका बर्षहरुमा रामनवमीमा हजारौं भक्तजनहरुको भीड हुन्थ्यो । देशविदेशका साधुसन्तहरु आउँथे । तर यसपाली लकडाउनका कारण कोही आएका छैनन् ।

प्रदेश सांसद रामअशिष यादवले कोरोन भाइरसको प्रकोप नियन्त्रण गरेपछि आगामी वर्षहरुमा पूजा गर्न सकिने भन्दै घर घरमा पूजा गर्न सल्लाह दिए ।