विराटनगर, चैत १७-कोरोना भाइरस(कोभिड–१९) को संक्रमणसँगै सरकारले लकडाउन गरेपछि भोकै परेका विराटनगरका सुकुम्बासी र दैनिक रोजगारी गरेर जीविकोपार्जन गर्ने मजदूरलाई विराटनगरका समाजसेवी व्यवसायीले राहत स्वरुप खाद्यान्न वितरण गरेका छन् ।

गुद्री बजार सब्जी मण्डी व्यवस्थापन समितिका अध्यक्ष पशुपति भगत, गुद्री बजारका तरकारी तथा फलफुल व्यवसायी अजयशंकर झा, आकृति ड्रग हाउसका संचालक महेश मंडल र प्रबल मेडिकल हलका संचालक सत्यम नेपालीको सहयोगमा विराटनगर ११ बसपार्क पछाडि नहरमा बसोबास गर्दै आएका १ सय ५० सुकुम्बासी र मजदूर परिवारलाई चामल तरकारी, नुन, साबुन, चाउचाउ र विस्कुट लागतयका खाद्यान्न वितरण गरिएको हो ।

राहत वितरण खाद्यान्न उपलब्ध गराउने दाता समाजसेवी व्यवसायीहरुसहित नेपाली कांग्रेस मोरङ सचिव नागेस कोइराला, गुद्री बजार व्यवस्थापन समितिका सचिव गुड्डु शाहब अहमदलगायतले गरे ।

उनीहरुलाई चामल, दाल, तरकारी, नुन, सावुन लगायतका अत्यावश्यक खाद्यवस्तुहरुवितरण गरेको प्रबल मेडिकल हलका संचालक नेपालीले जानकारी दिए ।

यस्तै दैनिक मजदुरी गर्ने विपन्न परिवारको समस्यालाई मध्यनजर गर्दै पुनः विराटनगरका आवश्यक ठाउँहरुमा सहयोग गर्न तत्पर रहेको आकृति ड्रग हाउसका संचालक महेश मंडलले जानकारी दिए । कोरोना भाइरसको संक्रमण फैलिएसँगै सरकारले लकडाउन गरेपछि मजदूरहरुले काम गर्न पाएका छैनन् ।

दैनिक रोजगारी गरेर छाकटार्ने मजदूहरुलाई भोकै बस्नु पर्ने अवस्था नआओस भनेर थोरै सहयोग भएपनि वितरण गरिएको गुद्री बजार सब्जी मण्डी व्यवस्थापन समितिका अध्यक्ष पशुपति भगतले बताए । उनीहरुले दैनिक मजदुरी गरेर हातमुख जोर्ने परिवार यतिबेलासमस्या पर्दै गएकाले आफ्नो ठाँउबाट सहयोग गर्न सबैलाई आग्रहसमेत गरेका छन् ।

सो टोलका अधिकांश दैनिक ज्यालादारी काम गरेर जिविकोपार्जन गर्दै आएका छन् । लक डाउनका कारण काममा जान नसकेपछी उनिहरुलाई परिवारको गुजारा चलाउन समस्या पर्दै गएको बताएका छन् ।