सरकारले हवाइसेवासहित देश लकडाउन गरेपछि सुदूरपश्चिममा कोरोना भाइरस (कोभिड–१९) को ‘स्वाव’ परीक्षणमा समस्या देखिएको छ । सरकारले मंगलबारदेखि लकडाउन गरेपछि प्रदेशमा ‘स्वाव’ परीक्षणमा समस्या भएको हो ।

सुदूरपश्चिम प्रदेशको प्रादेशिक प्रयोगशाला सेती प्रादेशिक अस्पतालभित्र राखिएको छ । ९ वटा जिल्ला रहेको प्रदेशका आठ वटै जिल्ला अस्पतालले पठाएको नमुना प्रादेशिक प्रयोगशालामा संकलन गरिदै आएको थियो ।

प्रदेशिक प्रयोगशालामा संकलन भएका नमुनाहरु धनगढी विमानस्थलबाट काठमाडौं पठाइने गरेको थियो । सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले ‘स्वाव’ परीक्षणमा लक डाउनले प्रत्यक्ष असर पारेको बताए ।

‘विमान नउड्ने भएपछि संकलन भएका स्वाब कसरी पठाउने भन्ने समस्या भएको छ, उनले भने । उनले जिल्लाबाट स्वास्थ्यकर्मीहरुले सवारी साधनमा नमूना ल्याइरहेको बताए ।

सुदूरपश्चिम प्रदेशको सेती प्रादेशिक अस्पतालले आइतबारसम्म आठ जनाको ‘स्वाव’ परीक्षणका लागि काठमाडौं पठाइसकेको छ । जसमा सात जनाको रिपोर्ट ‘नेगेटिभ’ आइसकेको छ भने एक जनाको आउन बा“की रहेको सेती प्रादेशिक अस्पतालका डाक्टर जगदिश जोशीले बताए ।

डाक्टर जोशीले सोमबार एक जनामाथि आशंका गरी ‘स्वाव’ संकलन गरिएको र मंगलबार तीन जनाको संकलन गरिएको बताए । उनले भने, ‘थप दुई जना पनि भर्ना भएका छन तर, उनीहरुको स्वाव तानेका छैनौ ।’ उनले दुई जनामाथि आशंका नभएकाले नतानिएको बताए । तर, उनीहरु आइसोलेसनमै उपचारमा रहेको बताए । डाक्टर जोशीले कसरी पठाउने भन्ने अहिले समस्या भइरहेको बताए ।