विराटनगर, चैत ९–अगुगमन टोलीले विराटनगर महानगरपालिका–९ घोगापैनीस्थित श्री सर्जीइम्पेक्समा कालोबजारी गर्न लुकाएर राखिएको अवस्थामा ठुलो परिमाणमा मास्क र सेनिटाइजर बरामद गरेकोे छ । अनुगम टोलीले आइतबार छापा मारेर लुकाएर राखिएको ११ हजार थान बढि सर्जिकल मास्क र ४ सय सेनिटाइजर बरामद गरेको हो ।

विराटनगर बजारमा सर्जिकल मास्क र सेनिटाइजरको कालोबजारी भइरहेको बिषयमा सरोकारवालाहरुले गुनासो गरिरहेको बेला विराटनगर महानगरपालिकाका प्रतिनिधी, औषधी व्यवस्था विभाग र प्रहरी समेत सम्मिलित अनुगमन टोलीले छापा मारेर मास्क र सेनिटाइजर बरामद गरेको हो ।

अनुगमन टोलीले सर्जिकल सामान र औषधीको थोक विक्रेता रहेको श्री सर्जीइम्पेक्सको गोदाममा लुकाएर राखेको मास्क र सेनिटाइजर बरामद गरेको औषधी व्यवस्था विभागका निमित्त प्रमुख संजीव शर्मा कट्टेलले जानकारी दिए ।कोरोना भाइरस संक्रमणविरुद्ध सर्वसाधारणले प्रयोग गर्ने मास्क र सेनिटाइजरलाई अत्यावश्यक वस्तुसरह लिइएको छ ।

तर औषधी विक्रेताहरुले भने प्रकोपको बेलालाई समेत ‘कमाउ धन्दा’ का रुपमा प्रयोग गर्न खोजेको पुष्टि भएको छ । राजेश अग्रवाल सञ्चालक रहेको श्री सर्जिइम्पेक्सबाट बरामद सेनिटाइजरमा एमआरपी मुल्यसमेत नखुलेको अवस्थामा भेटिएको हो । अनुगमन टोलीले थप अनुसन्धान गरिरहेको जनाएको छ ।