कोरोना भाइरसको नयाँ केन्द्र बनेको इटलीको अवस्था झनै बिग्रदै गएको छ । चीनपछि सबैभन्दा बढी संक्रमित रहेको इटलीमा मृत्यु हुनेको संख्या भने चीनमा भन्दा करिब २ हजार बढी हुन लागेको छ ।

इटलीमा पछिल्लो २४ घन्टामा मात्रै ७ सय ९३ जनाको मृत्यु भएको छ । कोरोना भाइरसका कारण इटलीमा एकै दिन मृत्यु भएको यो अहिलेसम्मकै बढी मृत्यु हो ।

इटलीमा पछिल्लो २४ घन्टामा मात्रै ६ हजार ५ सय भन्दा बढीमा नयाँ संक्रमण देखिएपछि संक्रमितको संख्या ५३ हजार ५ सय नाघेको छ । इटलीमा कोरोनाका कारण ४ हजार ८ सय २५ जनाको मृत्यु भइसकेको छ । यो संख्या चीनमा भन्दा यो १ हजार ५ सय ६४ ले बढी हो ।

इटलीको लोम्बार्डी कोरोनाबाट सबैभन्दा बढी प्रभावित बनेको छ । त्यहाँमात्र अहिलेसम्म ३ हजार ९५ जनाको मृत्यु भइसकेको छ । स्थिति भयावह बनेपछि इटली सरकारले थप कडाइ गरेको छ ।

शनिबार अबेर राति जारी गरिएको नयाँ नियमानुसार, सबै किसिमका खेल तथा शारीरिक गतिविधिमा रोक लगाइएको छ भने भेन्डिङ मेसिनको प्रयोगमा पनि निषेध गरिएको छ ।

इटलीपछि स्पेनमा पछिल्लो २४ घन्टामा २ सय ८५ जनाको मृत्यु भएपछि मृत्यु हुनेको संख्या १ हजार ३ सय ७८ पुगेको छ । यस्तै इरानमा १ सय २३, फ्रान्समा १ सय १२, बेलायतमा ५६, नेदरल्यान्ड र बेल्जियममा ३०–३० जनाको मृत्यु भएको छ ।

हालसम्म कोरोना भाइरसका कारण १३ हजार ५४ जनाको मृत्यु भएको छ भने ३ लाख ७ हजार ७ सय २० जना संक्रमित भइसकेका छन् । जसमध्ये ९५ हजार उपचारपछि घर फर्किएका छन् ।