काठमाडौं, चैत ३–बजारमा कोरोना भाइरसको त्रास बढेसँगै खाना पकाउने एलपी ग्यासको अभाव भएपछि नयाँ सिलिण्डर बिक्रीवितरणमा रोक लागेको छ । सोमबार प्रेस विज्ञप्ति जारी गर्दै नेपाल एलपी ग्यास उद्योग संघ र ग्यास विक्रेता महासंघ नेपालले चाहिनेभन्दा बढी ग्यास सञ्चय नगर्न पनि उपभोक्ताहरूलाई आग्रह गरेका छन् ।

बजारमा अहिले अन्य समयको तुलनामा ग्यासको आयात बढी नै रहेको भन्दै अनावश्यक भ्रममा परेर सञ्चय गर्दा बजारमा ग्यासको अभाव भएको संघको भनाइ छ । संघले ग्यास अभाव भएको हल्लाको पछाडि नलाग्न पनि उपभोक्तालाई आग्रह गरेको छ ।

संघले ग्यास बिक्रीवितरणका क्रममा उपभोक्तासँग घरमा भएको खाली सिलिण्डरलाई मात्र ग्यास दिन र नयाँ सिलिण्डर बिक्रीवितरण नगर्न नगराउन पनि डिलरलाई निर्देशन दिएको छ । संघले आमउपभोक्ताको हितलाई ध्यानमा राखेर विगतका दिनमा जस्तै नेपाल सरकार तथा सरोकारवाला निकायहरूसमेतको सहयोगमा आपूर्ति व्यास्था सहज राख्ने प्रतिवद्धता जाहेर गरेको छ ।