विराटनगर, फागुन ३०–मोरङमा पछिल्लो ८ महिनामा सवारी दुर्घटनामा परी ५३ जनाको ज्यान गएको छ । चालु आर्थिक वर्षको साउनदेखि फागुनसम्ममा मोरङमा ५३ जनाको मृत्यु भएको छ भने ४ सय ५२ जना घाइते भएको जिल्ला ट्राफिक प्रहरी कार्यालय मोरङले जनाएको छ ।
विभिन्न सडक खण्डमा मोटरसाइकल, टिपर, बस, ट्रयाक्टर, ट्रक, माइक्रो, जिपकार, टेम्पु, लगायतका सवारी साधन दुर्घटनामा ९० जना गम्भीर घाइते भएको प्रहरीको तथ्याङमा उल्लेख छ । दुर्घटनाबाट ५ जना बालबालिका, ५ जना महिलासहित ४३ जना पुरुषको ज्यान गएको जिल्ला ट्राफिक प्रहरी कार्यालय मोरङका प्रमुख प्रहरी निरीक्षक राकेशकुमार पोद्दारले जानकारी दिए ।
अघिल्लो वर्ष सोही अवधिमा भएको दुर्घटनामा परी ७५ जनाले ज्यान गुमाएका थिए । पछिल्लो समय मोरङमा सवारी दुर्घटना कम गर्न विभिन्न ठाउँहरुमा टाइम कार्ड लागू गरिएको बताउदै चेकिङलाई समेत प्राथमिकतामा राखिएको प्रहरी निरिक्षक पोद्दारले बताए ।
