जनकपुर, फागुन २९–एक जना होटल व्यवसायीले औषधि व्यवसायीलाई कुटपिट गरेपछि आन्दोलनमा उत्रिएको नेपाल औषधि व्यवसायी संघ धनुषाले ९ चैतदेखि औषधि पसलहरू बन्द गरेर आन्दोलनमा जाने चेतावनी दिएको छ । नेपाल औषधि व्यवसायी संघ धनुषाका पूर्वमहासचिव प्रमोद अग्रवाल ‘पप्पु’लाई रुफटप रेस्टुराँका सञ्चालक धर्मेन्द्रकुमार साहले कुटपिट गरेको र हालसम्म उनलाई कानुनी दायरामा नल्याइएको भन्दै औषधि पसलहरू बन्द गरेर आन्दोलनमा जाने बताएको हो ।
नेपाल औषधि व्यवसायी संघ धनुषाका महासचिव तेजनारायण चौधरीले गत २६ फागुनमा आफ्ना सङ्गठनका पदाधिकारी अग्रवाललाई दुव्र्यवहार गर्दै कुटपिटसमेत गरेकाले सो घटनामा संलग्न साहलाई ९ चैतसम्म कानुनी दायरामा नल्याइए संघको धनुषा शाखाले जिल्लाका सम्पूर्ण औषधि पसलहरू बन्द गरी आन्दोलन गर्न बाध्य हुने विज्ञप्तिमार्फत् चेतावनी दिएको हो ।
स्थानीय जनकपुर टेलिभिजनका सञ्चालकसमेत रहेका अग्रवालले गुठी संस्थानसँग भाडामा जग्गा लिएर औषधि पसल सञ्चालन आएका छन् । उक्त जग्गाबाट केही जग्गा साहले जबर्जस्ती धाकधम्की देखाएर कब्जा गर्न खोज्दै कुटपिट गरेको जिल्ला प्रहरी कार्यालय धनुषामा दर्ता गराइएको उजुरीमा उल्लेख छ ।
