विराटनगर, फागुन २२–घरेलु, लघु तथा साना उद्योगीहरुका समस्या सम्बोधन गर्न माग गरेका छन् । नेपाल घरेलु तथा साना उद्योग महासंघ मोरङको अगुवाईमा उद्योगीहरुले प्रदेश नं. १ का उद्योग पर्यटन बन तथा वातावरण राज्यमन्त्री बिजय बिस्वासलाई भेटेर साना, लघु तथा घरेलु उद्योगका समस्याहरु समाधान गर्न माग गरेका हुन् ।

बुधवार महासंघ मोरङका अध्यक्ष नरेन्द्र हुमागाइको नेतृत्वमा गएको टोलीले साना उद्योगीका समस्याका विषयमा उद्योगराज्यमन्त्री विश्वाससँग छलफल गरेको थियो । मन्त्री विश्वासलाई भेटेर उनिहले उद्योग सञ्चालन र स्थापनामा राज्यले दिनुपर्ने सहुलियतलगायतका विषयमा छलफल गरेका थिए ।

छलफलमा साना उद्यमीले समाज र राष्ट्रका लागि पुर्याइरहेको योगदानका विषयमा राज्यले गम्भिर भएर लगानीमा सहजता प्रदान गर्नुपर्ने लगायतका विषयमा ध्यानाकर्षण गराइएको महासंघ मोरङका महासचिव गोपाल काफ्लेले जानकारी दिए । भेटमा मन्त्री बिस्वासले घरेलु महासंघले उठाएका जायज माग सम्बोधन गर्ने आश्वासन दिएको काफ्लेले बताए ।

नेपाल घरेलु तथा साना उद्योग महासंघ मोरङको अधिवेशन नजिकिएसँगै उद्योगीका समस्या समाधान र विभिन्न विषयमा छलफललाई तिब्रता दिइएको छ । विराटनगरमा आगामी चैत २२ गते हुने महासंघ मोरङको २२ औँ जिल्ला भेला तथा १२ औँ जिल्ला अधिवेशन हुँदैछ ।

साना, लघु तथा घरेलु उद्योगीहरुको छाता संगठनका रुपमा रहेको महासंघको अधिवेशन नजिकिएसँगै सोही अनुरुपको तयारी अघि बढाइएको महासंघ मोरङका महासचिव गोपाल काफ्लेले जानकारी दिए । अधिवेशनकै शन्दर्भमा जिल्लाका विभिन्न पालिकामा शाखाहरुको अधिवेशन भइरहेका छन् ।

हालसम्म केराबारी गाउँपालिका, लेटाङ नगरपालिका र उर्लाबारी पालिका शाखाको अधिवेशन सम्पन्न भइसकेको जनाइएको छ । अन्य पालिकाहरुमा समेत जारी रहेको महासचिव काफ्लेले जानकारी दिए । त्यस्तै अधिवेशनकै शन्दर्भमा विभिन्न निकायसँग समन्वय, छलफल चलिरहेको महामसचिव काफ्लेले जानकारी दिए ।