विराटनगर, फागुन १२–बेलबारी फुटबल क्लबमाथि ४–० को शानदार जित दर्ता गर्दै मनाङ मर्स्यांग्दी क्लब काठमाडौ सेमिफाइनलमा प्रवेश गरेको छ । सोमबार धरान रंगशालामा भएको २२ औं अन्तराष्ट्रिय आमन्त्रण बुढासुब्बा टुबोर्ग गोल्डकप प्रतियोगितामा मनाङले उत्कृष्ट खेल प्रदर्शन गर्दै सेमिफाइनलमा युनाइटेड खर्साङ फुटबल क्लबसँगको भेट पक्का गरेको हो।

मनाङका लागि दयानन्द सिंहले २ गोल गरे भने निशान लिम्बू र बिमल रानाले समान एक÷एक गोल गरे । पहिलो पटक बुढासुब्बा गोल्डकप खेलेको मुख्यमन्त्री लिगको उपविजेता बेलबारी फुटबल क्लबले रक्षात्मक खेलेको थियो । खेलको म्यान अफ द म्याच घोषित हुदै मनाङका दयानन्द सिंहले १५ हजार रुपैयाँ नगद प्राप्त गरे । त्यस्तै खेलमा निशान लिम्बूले गरेको गोल उत्कृष्ट घोषित हुँदा उनले ५ हजार नगद पुरस्कार प्राप्त गरे ।

मंगलबार ए डिभिजन लिग विजेता मच्छिन्द्र क्लब काठमाडौ र भारतको सण्डे क्लब एफबिएलसी बीच अन्तिम क्वाटर फाइनल खेल हुने आयोजकले जानकारी दिएको छ । प्रतियोगिताको विजेताले नगद १० लाख र उपविजेताले ५ लाख नगद पुरस्कार पाउनेछ ।