विराटनगर, फागुन ८–विराटनगरमा जारी विराट एक्स्पोमा हेलिकोप्टरबाट सिटी टुरका लागि छुटको व्यवस्था गरिएको छ । आजदेखि मेला अवधिभर हेलिकोप्टरबाट विराटनगर परिक्रमा गर्दा २५ प्रतिशत छुटको व्यवस्था गरिएको हो । आजदेखि शनिबारसम्म २५ प्रतिशत छुटको व्यवस्था गरिएको आयोजक समितिका सदस्य निशान्त उपाध्यायले बताए ।

हेलिकोप्टरबाट नगर परिक्रमा गर्दा छुटको व्यवस्था गरिएपछि हेलिकोप्टर चढ्नेहरूसमेत बढेका छन् । हेलिकोप्टरबाट सिटी टुर गर्दा प्रतिव्यक्ति ७ हजार ५ सय शुल्क लाग्ने गरेको थियो । छुटपछि भाडा घटेर ५ हजार ६ सय २५ रुपैयाँमा झरेको छ । हेलिकोप्टरबाट विराटनगर परिक्रमा गर्दा निक्कै रमाइलो भएको यात्रुहरूले बताएका छन् ।

हेलिकोप्टरबाट सिटी टुरका लागि छुटको व्यवस्था गरिए पनि हलेसी, पाथिभरालगायतका स्थानमा जाँदा भने छुटको व्यवस्था नगरिएको आयोजक समितिले जनाएको छ । एक्स्पोमा हेलिकोप्टर पनि आगन्तुकहरूका लागि आकर्षणको केन्द्र बनेको छ ।

हेलिकोप्टर चढ्ने, हेर्ने र सेल्फी खिच्नेको भीड लाग्ने गरेको छ । शनिबारसम्म सञ्चालन हुने एक्स्पोमा १ सय ५० किलोको अष्ट्रिज, लोपोन्मुख विभिन्न प्रजातिका चरालगायत आकर्षणका रुपमा रहेका छन् । हरेक दिन दर्शकको चाप बढ्दै गएको आयोजक उद्योग संगठन मोरङका अध्यक्ष भीम घिमिरेले जानकारी दिए ।