विराट एक्स्पोमा नगद छुटदेखि विभिन्न उपहारसम्म - News Birat

विराट एक्स्पोमा नगद छुटदेखि विभिन्न उपहारसम्म

न्यूज विराट

विराटनगर, फागुन ४–विराटनगरमा जारी विराट एक्स्पोमा उद्योगी र व्यापारीहरुले नगद छुटदेखि विभिन्न उपहार योजनाहरू ल्याएका छन् । एक्स्पोमा उपभोक्तालाई आकर्षण गर्न बिक्रेताहरूले नगददेखि विभिन्न उपहारहरूको व्यवस्था गरेको बताएका छन् । क्वालिटी थाइफुडका बाबुराम पोखरलेलले स्टलमा सावुन, सरफ, फिनेललगायतको खरिदमा विभिन्न अफरको व्यवस्था गरिएको बताए ।

त्यस्तै एक्स्पोमा ग्याँस चुल्हो, किचन तथा ठूला होटल र पार्टी प्यालेसले प्रयोग गर्ने वस्तुहरुमा पनि प्याकेजअनुसार अफर ल्याइएको व्यवसायी प्रदीप घिमिरेले जानकारी दिए । अर्का व्यपारी श्यामकाजी थापाले एक्स्पोकै अवसर पारेर लत्ताकपडामा पनि विभिन्न अफर ल्याइएको बताए । उनले कपडाहरुमा १० देखि १५ प्रतिशतसम्म छुट दिइएको बताए ।

एक्स्पोमा नेपाली उद्योगी तथा व्यापारीले मात्रै नभई पाकिस्तानका व्यापारीहरूलेसमेत विभिन्न अफर लिएर आएका छन् । उपहार योजनाका कारण आफूहरुलाई आकर्षित गरेको उपभोक्ताहरु बताएका छन् । पाकिस्तानका उत्पादन लिएर आएका सहजाद कम्पनीका प्रतिनिधि सहजाद अहमदले हरेक वस्तुको खरिदमा १५ देखि ३० प्रतिशतसम्म छुटको व्यवस्था गरिएको जानकारी दिए । एक्स्पोमा दैनिक रुपमा पनि विभिन्न खालका आकर्षक उपहारको व्यवस्था गरिएको छ ।

शुक्रबारदेखी सुरु भएको स्क्स्पोमा हेलिकोप्टरबाट विराटनगर अवलोकन, पाथीभरा दर्शन, हात्तीको सवारीलगायत विभिन्न मनोरञ्जनको व्यवस्था गरिएको छ । यस्तै राष्ट्रिय र स्थानीयस्तरका कलाकारको साँगीतिक प्रस्तुति फेसन शो, सेल्फी जोनलगायतका विभिन्न आकर्षण पनि एक्स्पोमा समावेश छन् । नोबेल मेडिकल कलेज मुख्य प्रायोजक रहेको मेला ९ दिनसम्म सञ्चालन हुनेछ । मेलाको सुरक्षाका लागि मेला स्थल वरपर सिसी क्यामाराको राखिएको छ । एक्स्पोमा १ अर्बभन्दा बढीको कारोबार हुने अपेक्षा गरिएको छ । मेलामा दैनिक उपभोग्य वस्तु, कृषिजन्य उत्पादन, लत्ताकपडा तथा मनोरञ्जनका सामग्री, खानाका स्टल प्रदर्शनीका लागि राखिएको छ ।

एक्स्पोमा ज्येष्ठ नागरिकलाई निःशुल्क प्रवेशका साथै सर्वसाधारणलाई ५० रुपैयाँ र विद्यार्थीलाई २५ रुपैयाँ प्रवेश शुल्कको व्यवस्था गरिएको छ । ३ सय ४० वटा स्टल रहने एक्स्पोमा ४० स्टल अन्तराष्ष्ट्रिय, ६० वटा स्टल घरेलु तथा हस्तकला, १ सय ६० स्टल औद्योगिक उत्पादन, ३८ वटा अटोमोबाइल्सका छन्।

यस्तै १२ वटा बैंक तथा वित्तीय संस्थाका, २० वटा जनचेतनामूलक, खानाका १० वटा स्टल रहेका छन् । एक्स्पोको अबलोकन ३ लाख बढीले गर्ने अयोजक समितिले दाबी गरेको छ । शुक्रबारदेखी सुरु भएको एक्स्पो अवलोकनका लागि उल्लेख्य भीड लागेको छ । एक्स्पोमा पुगेर विभिन्न छुट र उपहार योजनाको लाभ लिन उपभोक्ता र अवलोकनकर्ताहरुको भीड लागेको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles