विराटनगर, फागुन १सप्तकोसी नदीमा सञ्चालित पानीजहाजहरू बन्द भएका छन् । जल यातायात व्यवसायी महासंघमा आवद्ध भएर सुनसरीको चतराबाट भोजपुरसम्म सञ्चालन हुँदै आएका विभिन्न ७ वटा पानीजहाजहरू सुरक्षाको कारण देखाउँदै बन्द गरिएका हुन् । महासंघले बिहीबार विराटनगरमा पत्रकार सम्मेलनको आयोजना गरी सो विषयमा जानकारी गराएको छ । महासंघका सदस्य राजेन्द्र कार्कीले स्थानीयको अवरोधका कारण सञ्चालनमा समस्या उत्पन्न भएपछि शहीद भूमिको त्रिवेणीमा पानीजहाजहरू रोकिएको बताए ।
उनले स्थानीय केही समूहले रकम माग्ने, निःशुल्क चढ्न पाउनुपर्ने, टिकटमा कमिसन दिनुपर्नेलगायत माग राख्न थालेपछि बन्द बन्द गर्न बाध्य भएको जल यातायात व्यवसायीले बताए । सो ठाउँमा बराह क्षेत्र जल यातायात तथा पर्यटन सेवा प्रालि, नेपाल रिभर ट्रान्सपोर्ट प्रालि, बराहक्षेत्र मरिन एन्ड रिसोर्ट प्रालि र सप्तकोसी टुरिजम एन्ड वाटर ट्रान्सपोटर््स प्रालिले ७ वटा पानीजहाज सञ्चालन गर्दै आएका छन् । सप्तकोसीमा दुई वर्षअघि पानीजहाज परीक्षण गरी सञ्चालनमा आएको थियो । एक वर्षदेखि भने नियमित सञ्चालन हुने गरेको थियो । सप्तकोसीमा चतराघाटदेखि भोजपुरको हतुवागढीको सिम्लेसम्म सातवटा पानीजहाज चल्दै आएका छन् ।
चतराघाटबाट बराहक्षेत्र र भोजपुरका विभिन्न भागसम्म पुग्ने यात्रुलाई पानीजहाज सञ्चालनमा आएपछि आउजाउमा सहज भएको थियो भने पर्यटकलाई समेत सहज भएको थियो । तराई झर्ने र पहाडतर्फ जानेहरू हिँडेर जाँदा निकै लामो समय लागे पनि भोजपुरको सिम्लेसम्म १२ देखि १५ मिनेटमा पुग्न सकिन्छ । जल यातायात व्यवसायी महासंघले यात्रु र सञ्चालकको सुरक्षाको ग्यारेन्टी तथा वैज्ञानिक र वैधानिक भाडा निर्धारण भएपछि मात्र जहाज सञ्चालन गर्ने जनाएको छ ।
