काठमाडौं, माघ २३–बालुवाटारस्थित ललिता निवासको जग्गा खरिदबिक्री प्रकरणमा भ्रष्टाचार मुद्दा खेपिरहेका कांग्रेस उपसभापति विजय गच्छदारले आफूविरुद्धको अभियोगलाई राजनीतिक रङ दिने प्रयास थालेका छन् । १३ पटकसम्म मन्त्री भइसकेका गच्छदारविरुद्ध हिजो अख्तियार दुरुपयोग अनुसन्धान आयोगले ९ करोड ६५ लाख ७६ हजार रुपैयाँ बिगो दाबीसहित विशेष अदालतमा मुद्दा दायर गरेको छ ।

उनीसहित १ सय ७५ जनाविरुद्ध मुद्दा दर्ता भएपछि आक्रोशित बनेका नेता गच्छदार भ्रष्टाचार अभियोगलाई राजनीतिक रङ दिन जुटेका हुन् । आज बिहानै कांग्रेस सभापति शेरबहादुर देउवा निवासमा पुगेर गच्छदारले राजनीतिक रूपमा सामना गर्ने विषयमा छलफल गरे । देउवासँग छलफललगत्तै उनले पार्टीका विभिन्न केन्द्रीय पदाधिकारी र प्रभावशाली नेताहरूसँग छलफल गरिरहेका छन् । भ्रष्टाचार मुद्दालाई राजनीतिक रङ दिन उनी कांग्रेस मुख्यालय पुगेर युवा र विद्यार्थी नेतासँग पनि छलफल गरिरहेका छन् ।

आफूविरुद्ध मुद्दा दायर गरेर सरकारले राजनीतिक प्रतिशोध लिएको भन्दै उनले पार्टीका विद्यार्थी र युवा नेतालाई उचालिरहेका छन् । गच्छदारले नेविसंघ अध्यक्ष राजीव पराजुली, तरुण दल अध्यक्ष जीतजंग बस्नेत, महिला संघ अध्यक्ष उमा रेग्मी, डेमोक्रेटिक लयर्स एसोसिएसनका अध्यक्ष योगेन्द्र अधिकारीसँग छलफल गरेका छन् । गच्छदारले तत्कालीन नेपाल लोकतान्त्रिक फोरमका नेताहरूसँग पनि आफूलाई लागेको भ्रष्टाचार मुद्दाको राजनीतिक रूपले सामना गर्न आव्हान गरिसकेको स्रोतको दाबी छ ।