एजेन्सी, पुस ७–अमेरिकी राष्ट्रपति डोनल्ड ट्रम्पले गत जुलाइमा युक्रेनी राष्ट्रपति भोलोदोमिर जेलेन्स्कीसँग टेलिफोन संवाद गरेको ९१ मिनेटपछि नै राष्ट्रपति कार्यालय ह्वाइट हाउसले युक्रेनलाई दिइने सहायता रोक्का गर्न निर्देशन दिएको एउटा इमेलबाट खुलासा भएको छ। टेलिफोन वार्तामा ट्रम्पले डेमोक्रेटिक नेता तथा आगामी राष्ट्रपतीय निर्वाचनमा उम्मेदवार बन्ने दौडमा रहेका पूर्व उपराष्ट्रपति जोए बिडेनविरुद्ध अनुसन्धान गर्न युक्रेनी राष्ट्रपति जेलेन्स्कीलाई आग्रह गरेका थिए ।

डोमोक्रेटहरुले यसलाई नै आधार मानेर राष्ट्रपतिले आफ्नो पदको दुरुपयोग गरेको आरोप लगाउँदै कंग्रेसको तल्लो सदनबाट महाअभियोग प्रस्ताव पारित गरेको छ । गोप्य जानकारी खुलासा गर्ने एक अमेरिकीले त्यो कुराकानी सुनेपछि छानविन अघि बढेको थियो । गत बुधवार हाउस अफ रेप्रेजेन्टेटिभ्सले औपचारिक रूपमा ट्रम्पविरुद्ध महाभियोग लगाएको छ । तर माथिल्लो सदन सिनेटमा रिपब्लिकनहरूको नियन्त्रण रहेकोले महाअभियोग दुई तिहाइ बहुमतबाट पारित हुने सम्भावना कम छ ।

हालै सार्वजनिक भएको इमेल अभिव्यक्ति स्वतन्त्रतासम्बन्धी मुद्दामा एउटा अदालतको आदेशपछि सेन्टर फर पब्लिक इन्टिग्रिटीले पाएको छ। ट्रम्पले जेलेन्स्कीसँग कुराकानी गरेको ९१ मिनेटपछि ह्वाइट हाउसका वरिष्ठ अधिकारी माइक डफेले युक्रेनलाई दिने गरिएको सहायता रोक्का गर्ने विषयमा सम्पर्क गरेको इमेलले देखाउँछ। टेलिफोन कुराकानीबारे खुलासा भएपछि ह्वाइट हाउसले त्यसको लिखित स्वरूप सार्वजनिक गरेको थियो ।

जसअनुसार ट्रम्पले जेलेन्स्कीलाई सहयोग गर्न आग्रह गर्दै जोए बिडेनविरुद्ध अनुसन्धान चलाउन आग्रह गरेका थिए । ट्रम्पले एउटा युक्रेनी ऊर्जा कम्पनीमा काम गरेका बिडेनका छोरा हन्टरविरुद्ध पनि अनुसन्धान गर्न आग्रह गरेका थिए । अमेरिकी माथिल्लो सदन सिनेटमा डेमोक्रेटिक नेता चक सुमरले युक्रेनलाई दिइने सैनिक सहयोग रोक्का गर्न आदेश दिइएको इमेललाई ‘विस्फोटक’ भएको प्रतिक्रिया दिएका छन् ।